حادثة الانتحار متاع طالب السنة اولى انقليزية في جامعة منوبة خبر
غير عادي بأتم معنى الكلمة .. الخبر
غريب و نادر و الحكاية عمرها ماصارت في التاريخ
يلزم نعملولها طواول و كراسي
الحدث موش في انو انتحر
الحدث هو الدليل على درجة الـ
engagement
متاع السلفيين
الحدث هو حتى لوين ممكن يوصلو السلفيين في الايمان بالمبادئ متاعهم
الحدث هو دليل على درجة التعصّب للقضية
الحدث هو : السيد هذا قتل روحو خاطرو يحب يدافع عالاسلام و يؤمن اللي من رأى منكرا فليغيرهم بيده ...
و بما ان * المنكرات * في تونس تحصى و لا تعد السؤال هنا : شنية انجمو نستناو مالناس هاذومة ؟
الاعلام التونسي يلزمو يتناول الحكاية
و بالطبيعة يثبّت مليح خاطر تنجم تكون خدعة
و يتناولها من غير ما يعمل الاغلاط متاع ماقبل الانتخابات
الاغلاط اللي عملهم كانو كي جبدو حكاية الهوية
و كي مسّو التوانسة في عقيدتهم
بفيلم نسمة و كلام محمد الطالبي و كلام يوسف الصديق و الشرفي
غلطو كي صدقو الكذبة متاع الشعب التونسي مثقف و ذكي
كي حكاو معاه بالفرانساوية
هذي هي الفرصة المناسبة باش كل واحد يصلح غلطتو
و الاعلام كي ياخو الحكاية لازم يعرف اش يقول و يعرف شكون يجيب يحلل
و نقولها واضحة و صريحة : الخطاب لازم يكون موجه للتوانسة الامّيين .. و التوانسة اللي انتخبو الهاشمي الحامدي و التوانسة اللي يمّنو بربي موش خطاب ملحدين موجّه للي بين منزلتين
و يفهمو اللي الناس المأدلجين سلفا موش ممكن نبدلولهم افكارهم بسهولة
اذا كان موش مستحيل
معناها بالفلاقي الفلاسفة يتواضعو و لو لحين و يوليو انبياء في سبيل تونس
اللغة العربية الفصحى ماتوكلش الخبز
و المصطلحات متاع المواطنة و التطرف و الانزلاق و الاعتدال و الموضوعية
و الكلام بالفرانساوية النتيجة متاعو عكسية
باختصار : خاطب القوم بما يفهمون
حاجتنا تتعمل برامج في التلفزة على السلفيين اش عملو في السودان و في مصر و الجزاير
حاجتنا الاعلام التونسي يتشجع و يعمل برامج يطـّاكي فيها شيوخ كيما
محمد حسان و ابو اسحاق الحويني
خاطر الزوز هذومة هوما الرّب المقدّس متاع الخوانجية
وقيّت في تونس باش نحكيو على افكارهم كيما ختان الاناث و الخروج عالحاكم
و ارضاع الكبير و بول البعير في التلفزة التونسية
احداث سليمان نتمنى يعملو عليها وثائقي و
الفيديو متاع جماعة سيدي بوزيد اللي في السوق الاسبوعية
اللي السيد يحكي عالجهاد ضد الحكومة لازم يعدّيوه
وقتها نشوفو ردّة الفعل متاع السلفيين اللي ماناش باش نستنّاوها برشة
المصيبة اللي الناس هذومة نقولو عليهم سلفيين
و هوما جعبهم يتحلّ
و كان تقول متشددين يفرحو زادة و يحسو بالنشوة
نحتاجو كلمة او مصطلح يقزّمهم و يبيّن اللي هوما ناس متصحّرين فكريا
و لبسو جلباب و عملو لحية و عمامة و يحبّو يوليو سلفيين
السلاح يدور في البلاد لاول مرة في التاريخ
و الثوار متاع ليبيا باش يدعموهم نهار اللي تلحم
المتطرفين في الجزاير يستناو فيها
المواجهة معاهم من تحصيل الحاصل
جايينها جايينها
اليوم و الا غدوة
نفضل تكون اليوم قبل ما الجناح المدني متاع الخوانجية
ينفيلتري في مؤسسات الدولة و خاصة الجيش و الشرطة
نفضل تكون اليوم قبل مايكثر السلاح في تونس و يدخل من حيث لا ندري
وقتها الدّم باش يكون برشة
و تونس تخسر برشة
قلناه الكلام هاذا من هاك العام ، و القادم أسوأ، اعلامنا صنيعة شبعة نوفمبر و أحد مؤسسي الاستبداد، ما ينجم كان يزيد يخربها ، و قواعد النهضة ماهيش باش تسلم اليوم في فرصتها للجهاد و الانتقام و اقانة الشريعة و نصب المشانق لأعداء الثورة ... و تفكرني .... بسيكو مارد و صفحات الغباء تضم ميات الالاف .... بحيث جايينها جايينها
RépondreSupprimer