dimanche 18 décembre 2011

الجبالي و الحد الادنى

شنية باش يكون موقف المعارضين للنهضة كان يطلع الجبالي و يعطي قايمة متاع حكومة لا فيها الصيد لا فيها نسيب الغنوشي لا فيها 50 وزير ؟
النهضة تنجم تكون هي اللي خرّجت اشاعة نسيب الغنوشي هو وزير الخارجية
باش كي تحط اي واحد نهضاوي في اي موقع النقد ما يكونش بنفس القوة
بعد اللي الناس شبعوها نقد في حكاية اصلها اشاعة
علاش المعارضين ما ينجموش يصبرو عالنقد ؟
علاش ماتخليوش النهضة تغلط و تصلحولها اغلاطها قبل ما تعملهم ؟
المشكلة الكبيرة اليوم انو اللي يتقال عالفايسبوك نقراوه في الجرايد و نسمعوه في الاذاعات الكل و يوصل لنشرة الانباء
في القناة الوطنية بالضبط كيما حكاية القايمة الغير الرسمية متاع الحكومة
و المعلومات المدسوسة متاع شهرية الرئيس و الوزراء و غيرهم
يتحكى عليها في البرامج متاع القنوات الكل
و ماثماش برنامج يحكي عالسياسة في اي قناة او اذاعة ماتكونش فيه
معلومات او اراء او اشاعات مالفايسبوك و لو بطريقة غير مباشرة
و الصفحات اللي ضد النهضة بسبب قلة وعي المشرفين عليها يساهمو في هالاشاعات
باش نعمل فرضية انو الجبالي باش يعمل حكومة فيها عدد وزراء كيما في حكومة
السبسي نفس الشهريات .. لا فيها صيد لا فيها نسيب الغنوشي و بالعكس فيها
شخصيات مستقلة عندها كفاءة .. و الوزراء في حكومة السبسي اللي اثبتو
جدارتهم و كفاءتهم يخليهم ... هذا نورمالمون العادي و الطبيعي
هذا الحد الادنى اللي يعملو رئيس حكومة منتخب تهمو مصلحة البلاد
خاصة كي نعرفو اللي الوزير باش يشد وزارة يلزمو شوية وقت باش يفهم العملية
و يعطي الاضافة و يقوم بدورو على قاعدة
من غير شائعات الفايسبوك اللي وصلت للاعلام الرسمي شنية يكون موقف الراي العام ؟
الناس باش تقول : عمل واجبو و في اقصى الحالات يعطيه الصحة
بالشائعات متاع حكاية نسيب الغنوشي و غيرها باش تولي النهضة مظلومة
و الجبالي يولي عمر بن عبد العزيز رسميا
الحالة الثانية : الجبالي باش يعمل حكومة على قياس النهضة لا فيها نسيب الغنوشي
لا الصيد لا والو و فيها نهضاويين بنسبة 80 في المائة
الحالة الاولى من غير شائعات : امو باش تتناك
بالشائعات : النهضة مظلومة و الجبالي مظلوم
الحالة الثالثة : الحكومة فيها نسيب الغنوشي و الصيد و اللي هي حاجة مستحيلة
و الايام بيناتنا
من غير شائعات : مظاهرات ممكن توصل لنتائج موش متوقعة
بالشائعات : الناس ماتجيهاش صدمة و متحضرة نفسانيا للحكاية و ردة الفعل تكون
موش قوية برشة
باختصار النهضة قاعدة تكور بينا عن طريق الفايسبوك
و ما يلزمناش ننساو اللي اعتصامات القصبة اللي جابت المجلس التاسيسي
هي نتاج الفايسبوك
و الفايسبوك مسيطر عليه في جزء كبير برشة الصفحات الموالية للنهضة
بالفايسبوك .. الحد الادنى اللي يلزم يلتزم بيه الجبالي يتحول للحد الاقصى
و الشعب جبري بنخبته و مثقفيه و اعلامه و مهمشيه .. و ان شاء الله ديمة هكة

Aucun commentaire:

Enregistrer un commentaire