المرزوقي و الجبهة الوطنية هوما الحل

اذا كان ما نغزروش للمشهد السياسي بعد عام و نحاولو نتنبؤو او نخمّنو كيفاش
الامور باش تكون بعد عام ... و نتصرّفو عالاساس هذاكة مستحيل نقدمو

السؤال الاول : شنية النظام السياسي اللي باش يقرّو المجلس التاسيسي؟
النهضة و افاق و الشيوعي يحبو على نظام برلماني
المستقلين برشة منهم مع الرياحي اللي يحب على نظام رئاسي
جماعة العريضة .. او اللي قعدو منهم .. كيف كيف
و بقية الاحزاب بما فيها المؤتمر و التكتل يحبو على رئاسي السلطة التنفيذية فيه
مقسومة بين الرئيس و البرلمان
يعني اغلب الظن الحكاية باش تكون نصّ رئاسي
في النظام هذا تكون انتخابات رئاسية تجيب رئيس
و بعد انتخابات برلمانية تجيب حزب حاكم
اذا كان الشي هذا صار شكون ينجمو ينافسو عالرئاسة ؟
او بالاحرى شكون باش ينجّم ينافس المرزوقي على الرئاسة ؟
في حالة انو النهضة رشحت الجبالي للرئاسة او اي مرشح من عندها
باش يكون هو المنافس الكبير
النهضاويين الكل باش ينتخبو الجبالي
بالنسبة للي يموتو عالشعبوية و اللي بين البينين ( بين الاسلاميين و موش اسلاميين ) و الفقراء و الاميّين باش ينتخبو المرزوقي

البقية شكون باش ينتخبو ؟
المترشحين درجة ثانية
بن جعفر و الشابي
المرشحين درجة ثالثة
الحامدي مرجان الزحاف سليم الرياحي و بن براهيم و ممكن نزيدوهم طارق كاكاوية
درجة رابعة
هوما الجماعة اللي باش يمدو وجوههم للشهرة لا اكثر و لا اقل و العدد متاعهم باش يكون كبير خاصة اذا كان التاسيسي ما عملش شروط من نوع يلزمك 50 الف
توقيع او ما شابه باش تترشح


الانتخابات اللي فاتت عطاتنا قاعدة بيانات مهمة برشة في تركيبة المجتمع التونسي
و اهم الخصايص متاعها :
الجهوية : اكتساح ابناء الجنوب في الجنوب
مرجان في الساحل
الهاشمي في بوزيد و ضواحيها
الزحاف في صفاقس
و حتى حمة الهمامي دبّر كرسي من سليانة

الخاصية رقم 2 : نسبة التخنويج : مليون و نص انتخبو النهضة
و نحب نأكد انو العدد هذا غير قابل للارتفاع
الناس اللي تساند النهضة السواد الاعظم مشاو للانتخابات اللي فاتت

ثمة 600 الف بين منزلتين اللي انتخبو المرزوقي و الهاشمي
اقل شوية من زوز ملاين انجمو نقولو عليهم ضد النهضة بالرغم اللي
ثمة ناس صوتت لقوائم مستقلة و احزاب صغيرة موش ممكن نعرفو
التوجه متاعها

النهضاوي اللي انتخب النهضة مقتنع بحاجة اسمها الاسلامي السياسي
و مقتنع باللي الاسلام هو الحل مستحيل ينتخب غير النهضة حتى لو عملت النهضة
سفارة لاسرائيل و حتى لو الفقر في تونس ولى 80 في المائة

نجيو توى للمرزوقي :صحيح الراجل مڨربع و مجنون
لكن موش خوانجي و مستحيل يطيّح السروال في امور تخص الحداثة
المرزوقي تقولش عليه هو الوحيد اللي فهم اللي احنا التوانسة تحشالنا مع بعضنا
و مانجمو كان نعيشو مع بعضنا : اسلاميين و موش اسلاميين

بن جعفر الشعبية متاعو هبطت بعد دخول التكتل في ائتلاف مع النهضة
لكن باش ترجع تطلع بعد ما يفهمو برشة توانسة اللي الائتلاف حاجة و التحالف
حاجة اخرى

الشابي تحرق ابان الثورة لكن توى بدى يتحسن لكن قاعد هو و الحزب متاعو
يبالغو في المعارضة و قريب يعملو الريحة

الهاشمي كلا كف في حكاية وكالة الاتصال الخارجي اما الجهويات و الخطاب
الشعبوي اقوى من كل شي

يعني اذا كان نفترضو نسبة الاصوات على ضو المعطيات هذي باش تكون ثمة
جولة اعادة بين الجبالي و المرزوقي
خاطر اصوات الناس اللي ضد النهضة باش تتقسم بين الشابي و بن جعفر و البقية

النهضاوي يعاود ينتخب الجبالي و اللي بين منزلتين و اللي ضد النهضة
يظطرو ينتخبو المرزوقي بمنطق اخف الضررين كيما صار في مصر
في جولات الاعادة في الدوائر اللي فيها واحد مالاخوان و واحد مالسلفيين
الناس اللي يكرهو الاسلام السياسي و الخوانجية اظطرو يدعمو الاخوان
هذا بالطبيعة اذا كان قانون انتخابات الرئاسة يفرض جولة اعادة بين الاول و الثاني
اذا كان حد ماجاب 50 في المائة

نجيو توى للبرلمان
الحزب الحاكم هو اللي باش يجيب الاغلبية
اذا كان التقدميين مايعملوش جبهة وطنية يراعيو فيها نزعة الجهويات عند
التوانسة و يدخلو بيها الانتخابات باش تكون النهضة هي الحزب الحاكم
يعني الامكانية كبيرة برشة باش
يكون المرزوقي هو الرئيس
في نظام نصف رئاسي فيه برلمان الحزب الحاكم فيه هو الجبهة الوطنية
و النهضة هي المعارضة


النقد اللي قاعد يصير للنهضة موش باش يجيب حتى نتيجة
خاطر الخوانجي يقعد ديمة خوانجي
الجهود بكلها يلزمها تتركز في اجبار الاحزاب الاخرى باش تعمل جبهة وطنية
ماكانش النتيجة باش تكون المرزوقي رئيس و النهضة هي الحزب الحاكم
في نظام نصف رئاسي