المؤامرة صحيحة .... و باش تلحم بالظبط عن قريب

موش ممكن النهضة تحكي حكاية خطيرة كيما هكة من غير ما يكون عندها ما تفضح في المستقبل .. ثمة شكون مالقوى الديمقراطية اتصل بسفارات غربية خاصة كيما فرنسا و امريكيا و طلب منهم باش ما يعاونوش حكومة النهضة و هذي حاجة عادية و حركة وطنية من ناس متأكدين اللي النهضة باش تهزّ تونس للهاوية و للتخلف خاطرهم ببساطة ناس خارجين مالحبوسات و عندهم اعاقات ايديولوجية تمنعهم باش يكونو سياسيين ممكن يقودو بلاد للتقدم و النمو و التطوّر
... لكن البهامة وين : الديمقراطين لتوّى لا فهمو اللي الغرب بصفة عامة كي جا الشبح متاع الربيع العربي و الخطر متاع بناء ديمقراطيات في الوطن العربي و هذا ما يشكل خطر على اسرائيل و اضعاف لاقتصاديات اروبا و امريكيا اللي يتمعّشو من بترول العربان و اللي يمثلو زادة سوق استهلاكية رهيبة ... كي جا الخطر متاع الديمقراطية اصرّو انو الاسلاميين هوما اللي يشدو الحكم و دعّموه اعلاميا و ماديا عن طريق قطر و السعودية اللي ماعادش ثمة عاقل على وجه الارض مازال يشك في التبعية متاعهم للغرب بصفة عامة و امريكيا بصفة خاصّة ... امريكيا ارادت تخلّف في تونس اذا حكموها الاسلاميين او فتنة اذا قاومو العلمانيين و هكاكة البلاد ما تقوملهاش قايمة و تونس ما تكونش قدوة للعربان اللي اذا كان شافو تونس شدوها العلمانيين و ولات فيها ديمقراطية و ازدهار الشعوب الاخرى تلفظ الاسلاميين و تطالب بالعلمانية
العلمانية اللي الاعلام العربي بالتنسيق مع الشيوخ و القنوات الدينية حوّلوها الى عداء للدين و الحاد و كفر ... و اعوذ بالله من العلمانية ... القوى الديمقراطية لتوة لا فهمت اللي ممكن فرنسا تعاطفت معاهم كي كانو معارضين لنظام بن علي خاطر ياسر دكتاتورية ... لكن كي يولي اللعب بعشاهم تتبدّل المشامية و تولي المصلحة الاقتصادية لفرنسا او اي دولة غربية فوق كل اعتبارات ... لذا اذا كان نحبّو نغيّرو الوضع يكون من داخل و بيدينا ... الشعب الجاهل اللي اختار الخوانجية باش يحكمو البلاد لازم توعيتو ... موش تعطيو فرصة للخوانجية باش يفضحوكم بحكاية خطيرة اللي اغلبية التوانسة باش يفهموها على انها خيانة لتونس ... السفارات عاودو الحكاية للنهضة خاطر يحبّوها تلحم ... و النهضة مكبّشة في السلطة و تحبّ تربح الانتخابات الجاية باي طريقة و باش تفضح اللي مشاو للسفارات ... و باش تلحم ...
و اياكشي تولع