يسألونك عن الاعتصام قل فيه مضــــــــرّة ومنفعة لتونس ومضرّتو أكثر من نفعو

هذا انا نسميه اعتصام خرّ طرّ
ماللي كنا في واحد من اقوى الانظمة الدكتاتورية البوليسية و الطـّـحينية في العالم ..
نحبوّ في ليلة و نهار ... او بالاحرى شهرين .. نولـّـيو كيما البلدان السكندينافية في نظام الحكم
أولا : الاصلاح ما ينجــّم يكون الا على مراحل
ثانيا : الحكومة الحالية وراها أشباح مانعرفهوهمش .. عندهم الفلوس و السلطة و العلاقات في الداخل و الخارج و السلاح
ثالثا: المطالب برشة ... اكثر من مطلب واحد تولي عـــْـدم
حسب رأيي نكتفيو بمطلب واحد في مرحلة اولى اللي هو مثلا استقالة الغنوشي ..
او الغنوشي و البكوش مع بعضهم
اهاوكة زوز في خوتة ...
و الظغط متاع الاعتصامات و المظاهرات يجيب وقتها نتيجة ...
خرجو الكلاب الزوز؟ نشوفو شنية المطلب اللي بعدو .... و هلمّ جرّا
صحيح اللي الحكومة كل مايزيد نهار كل ماتزيد تنجح في اللي تحب توصلــّو ..
لكن توّى ماعنــّاش برشة خيارات و الشهر و نصّ اللي تعدّاو طمسو فيهم برشة
حقائق ... و أدلة تورّطهم في الفساد ..توى بعد شهر و نص اللي حج حج و اللي عو ذق عو ذق
مطالب كيما استقلال القضاء و لجنة تقصي الحقائق و غيرو امور تنجّم تصبر خمسة شهر أخرين و ماهياش مصيرية في الوقت الحالي ...
أهم حاجة نبدّلو الدستور و المجلة الانتخابية
رابعا : من باب المستحيل كوْنو الحكومة تستجيب للمطالب هذي
الحكومة موش باش تسقــّط روحها بروحها معناها حتى كان باش نطلبو حدّ
نخاطبو الجيش ديراكت هو الوحيد اللي ينجم يطيــّر الحكومة
و بالنسبة للجيش راهو زادة موش مضمون أنو يضمنلنا الامور تمشي كيما نحلمو
خامسا : حزب التجمع باش يتحل اليوم و الا غدوة . عم فرحات عمل مطلب في حلانو
و اذا كان جماعة التجمع لقاو ثنية او ثغرة في القانون باش الشي هذا ما يصيرش او انهم يرجعو باسم اخر... ماناش باش نقعدو نتفرجو و نأكدلكم اللي الشـّـُـعَبْ و مقرّات التجمّع بكلها تتحرق
سادسا : المظاهرات و الاعتصامات تنجم الحكومة تزيد تشعّلها و تكثر الفوضى
و هذا ما يمكــّـنها باش تزيد في عمرها طبقا للدستور اللي يقول المبزع رئيس مؤقت
مدة 45 حتى 60 يوم -
معناها مازالــّـو 3 جمعات اخرين -
الـ 3 جمعات يحبو يردوهم 3 شهر و الـ 3 شهر 3 سنين ... مالا يلزمنا مانعطيوهمش الفرصة
سابعا : الناس تحب الفلوس ترجع توّى .. القضاء عالفساد توّى .. و كل شي توى
بالنسبة لي
المهم اليوم هو قانون الانتخابات و تاريخ واضح للانتخابات و أسامي المترشحين و برامجهم . البقية تعملو الحكومة اللي احنا باش ننتخبوها

-
-

أحنا توّى في دوّامة و زخم كبير متاع أخبار و أحداث و مؤامرات تعمل فيهم حكومة
الالتفاف و الاشباح اللي وراها
اللي باش نعتصمو بيه باش تسقط الحكومة و يجي مجلس تأسيسي الله أعلم وين باش يهزّنا
نعتصمو بمطلب واحد و واضح و ظاهر ... موش شــْـريطة متاع مطالب مستحيــــل تتحقق
هذا من جهة
و من جهة اخرى مهمّة برشة
الاعتصام هذا ممكن ياسر النتائج متاعو تكون عكسية و كارثية
و على سبيل المثال و ان شاء الله نكون غالط :
الحكومة تعمل كارثة في وسط الفوضى على غرار ليبيا .... و الغرب يساعدو
الشي هذا يصير باش بقية الشعوب اللي تحب تثور يقولولهم شوفو تونس آش صار فيها
بوتفليقة و القدافي ممكن يعاونوهم باش الشيئ هذا يصير ( بالرغم اللي القذافي لاهي في همّو لكن كي يظن اللي الليبية كي يشوفو تونس ولات دمار ممكن يتراجعو أو عالاقل هو يمشي في بالو هكة ... خاطرو في وضع يعمل فيه اي حاجة حتى كان الامل ضعيف )
- ممكن يعملو تفجيرات او غيرو قال شنية جماعة ارهابيين و بلا بلا بلا ... و يكون هذا اتوروت باش ترجع القبضة الحديدو نرجعو وين كنا
- الفترة الانتقالية تنجم تتطوال في عوض 6 شهر ... تولي الدوبل او اكثر
نتمنى الناس تشد ديارها و كان باش تعمل اعتصام نقلهم رانا جايينها جايينها نهار 15 مارس ... توى موش وقتو و مطالبكم برشة ... و مستحـــــــــــــــــيل تتحقق