lundi 31 mai 2010

ديني الاسلام و دينك مسيح-1



جِيُورْجيّة .. بْلـُنـْدَة .. شِفاهٌ غَليظـَة .. عَندها ڤــُمّايَة لا تـُوصَفْ ... سِلعَة غَوّابيّة.. ياسِر مبْلولة ... ديمة مبلولة ...هذا عْرفتو
ممْبعـّد ... امّا نـْهارت اللي شفتها في الفاك في الصّال متاع الانترنات .. و هيّ داخلة ... جات العينْ في العين ... دَڤـّــِتـْنـِي ... دَڤـّـِيتـْهَا ... خزرة من عينك سحرتني ...جات قعدت في پوست وْرايا ... مالقيتش كيفاش نكلـَّمها ... الصّال مْعـبّية ... وانا ساعات نولي حشّام ...توّى ثمّة خمسة سنين ماللي تفارقنا... لليوم كي نـْشوفها نتـْخلـْبزْ و ندخل بعضي ... كل ما نشوفها نلقاها زادت انوثة و اناقة ... قداشني كنت مْدَكّ ْ ... ديني الاسلام و دينها مسيح .. بالرغم اللي هي على خاطري بَطـّلت ماكلة الحلـّوفْ .. و الغريبة اللي لتوّى ما عادش تاكل الحلوف .. عمرها ما كذبت علي و توّى زادة ما عندها علاش باش تكذب ... انا ساعات نكون حشـّام و ساعات نكون بْليد برشة و جَريء برشة ... رْميتْ كْحُلْ عالپوسْت .. نلقاها تـْشَاكِي في الايمايل متاعها ... صْمَرْتـُو عْلى مَرَّة ... بْعثتلها اي مايل مجنون عالبلاصة ... : هاني قاعد وراك ... كان الدڤة اللي دڤيتهالي صحيحة و انا فهمتها صحيح ... راهو شُعور مُتبادَل ... حتى انا نحب نقطـّعْلك شـْفايفك ... ياسر ڥولڤار .. اما ما باليد حيلة ... كنت هكاكة ... و قـْعدت نستنـّى فيها باش تعمل آكـْتووَاليزي ... و انا على اعصابي ... معاها كنت ديمة على اعصابي ... و كنت معاها صعيب برشة .. الناس الكل يقولولي اللي انا صعيب .. حَزّارْ برشة ... و راسي صحيح ... اما بعد مدة قصيرة معاها وليت عبد آخر ... لا ڥي اون رُوزْ ... شيلافورمي ولا ّ يقول صباح الخير لأعداؤو في الخدمة ... ولا ّ مايهموش ... يحبّ يكمّل الخدمة ليه ليه باش يروّح لـ 'مايا' ... الضوّ في داري مقصوص ... حتى في المانيا يقصّو عليك الضوّ كان ما تخلـَّصْش ... قاتلي ايجا اسكن حذايا حتى يرجع الضّو ... مازلت كي شدّيت خدمة ... حَبْرْ ما خْلـُصْت مْشيت خلـّصتو ... الضوّ رجع ... اما انا ما رجعتش ... مايا قتلي لواه راجع ... بالحق لواه راجع ؟ جنة عرضها السماوات و الارض ... نقوم الصباح الخمسة باش نمشي نخدم تقوم مايا معايا تـْجيبْلي الفطور للفرش و تحطلي ماكلتي في الصّاك و نعملو كـَلـْبْ و نمشي انا نخدم و ترجع هي ترقد ... وين باش نلقاه هذا الكل ... مومِسْ و طباخة و فامْ دُو مِينَاجْ ... على ذمتي ڥانـْتـْكاطْ بلاش فلوس ؟؟؟؟ هكة خمّمت ... قداشني لئيم ... قداشني حيوان ... ذيب ... يستنـّى في الفريسة متاعو تبـْلـَعْ الطـُّعْم.. تي هيّا شوف آش كتبتلك ... أغـْلبْ البـْلـُنـْداتْ يْحِبّو عالشكلاطي ... الرجل الشرقي ... يحبّوه صْعيبْ ... ثمة برشة نساء في أروبا ينطبق عليهم قول ام كلثوم : و يعجبني خُضوعي إلـِيهْ ... تـْحبّ تحسّ اللي الرّاجل مْسيطر عليها ... ياسر ساكـْسي ... بعد مايا ولـّيت نَنـْصح في صْحابي ... أحسن نساء في العالم هوما متاع أروبا الشرقية : تحْتـَرْمكْ و تـْخافْ مِنـّكْ كيما العَرْبـِيَّة ... و تـْشـَيّـْخِكْ كِيمَا الالـْمانِيّة ... قالولي أنْتَ ذ ُكُوريٌ جِدّا ...
وَ أخيرا .. قـْراتْ الاي مايلْ ... وِبْدَاتْ تِكـْتِبْ : آناهُوَ منهم انتي؟ اللي لابـِسْ شومِيزْ و لا ّ اللـّي لابسْ مريول ْمْخطـّطْ ؟
شنية ؟؟؟ صاحبي "كبّول" بجنبي نسيتو جملة
... يا وَيْلي ... قَدْ ذ َكـَرَتـْني في المَوْضعِ الثـّاني ؟ انّها انيقة جدّا فهي اذن تـُحِبُّ المتأنـّقين ...
آه ... كبّول أشبّ مني ...
و بوڤوصْ عْليّ. في بالو بالفيلم ... متبّعو ملـّي بدا الاشهار ... تطلعشي الطفلة تلعب عالحبلين ؟ تطلعشي دڤـّتـّو هو زادة ؟ يطلعشي هو دڤـّها و ناوى عَالخْنـَنْ ؟ نطلعشي انا نِسْتخايـِل ْ اللي هيّ خزْرتـْلي جِمْلـَة ؟
يا وَيْلِي ....


يتبع

Aucun commentaire:

Enregistrer un commentaire