تونسي في الكوما من ديسمبر قام كان اليوم

بعد غيبوبة في قسم العناية المركزة في مستشفي الرابطة بسبب حادث سير استمرت منذ منتصف ديسمبر 2010
افاق منذ قليل ... سمع ضجيجا و صراخا عبر النافذة ... ضغط على زر النجدة
جاءت ممرضة حسناء ... ابتسمت ابتسامة عريضة و قالت : آآآ فقت ؟ الحمد الله على سلامتك
هو: مارسي يا ...حوتة .. قلي اش فمة ياخي البرّة هالعياط الكل
هي : ثمة قراف متاع موظفين
هو :علاش ؟
هي : ثمة شكون طالب الترسيم و ثمة شكون طالب الزيادة في الشهرية
هو : اي علاش لا ... ما فيها باس
حدقت به الممرضة برهة ثم تحولت ملامحها الى مزيج غريب من الفضول و المفاجئة
نظر اليها وقال مستغربا : شبيك تغزرلي خايفة تقولش عليك شفت عبيثة
هي ( تصرخ ): ماتقليش مافيبالكش ؟ اي بالحق منين في بالك ؟ انت في الكوما عندك 7 جمعات
هو : اش ثمة يا بنتي شبيك ؟
هي : مانا عملنا ثورة !! و بن علي قطع للسعودية
هو : نعم للة ؟؟؟؟؟؟؟؟؟؟؟؟؟؟؟؟؟
... جحظت عيناه و بدى لها أنها تسمع نبضات قلبه المتسارعة ... بدى لها أنه لن يصدقها أبدا ... أراد أن يقول لها انه مريض و لا مجال لمثل هذه الدعابة البائسة ...
ناولته الجريدة ...
نظر الى التاريخ على اليومية المعلقة على الحائط ... التاريخ على الجريدة ...
انتابته حالة من الجمود
أخذت تقص عليه ما جرى....
منذ البداية ...
بداية البداية ...
بداية من الصفعة ....
انهمرت دموعه مدرارا ... كان يبكي كطفل صغير .. يبكي مالفرحة ... يبكي بالغصّة
جلبت له كوبا من الماء و استدعت الطبيب و اتنشر الخبر في المستشفى
و تدفق الفضوليون من ممرضين و عاملين و مواطنين لرؤية ردة فعله
هو : اي ما قلتوليش ؟ شكون رئيس توى ؟
واحد : فؤاد المبزع
هو : نعم ؟؟؟؟ ياخي ما حطوهش في الحبس هذاكة ؟؟
واحد اخر : تي لا .. رئيس مؤقت حتى يعملو انتخابات
هو : ملا حكاية ... عاد كملتو خليتو محمد الغنوشي وزير اول و انتوما صرفتو صرفتو
انفجر كل الحاضرين ضحكا .. و قال احدهم : تقولش عليك حاضر
هو : البرلمان و التجمع تحلوشي ؟
واحد : لا مازالو
هو : فاش تستناو ؟؟؟؟؟؟؟
هذه المرة لم يجبه أحد ... و انفض الجميع من حوله
صرخ بأعلى صوته : و تقولولي ثورة ؟؟؟؟

تساؤلات مواطن تونسي احمق

بن علي قال موش باش يترشح .ياخي العباد مازالو باش ينتخبوه بعد المجازر اللي عملها ؟

بن علي رخص في السكر . الدولة عندها فلوس بزايد ؟

بن علي وعد بثلاثة مائة الف موطن شغل في عامين

موش معناها اربعة مائة و سطاش موطن شغل جديد كل يوم حتى نهار السبت و نهار الاحد ؟

بن علي نحى الرقابة . بعد ما عرفو الشعب اللى هو سفاح و وزير الخارجية استقال و قال اللى العصابات الملثمين اللي دمرو البلاد هو اللي بعثهم . مازالشي عندو حاجة يخاف منها تتكشف ؟ هو اللي أمر باش البوليسية باش تقتل العباد و بعث عصابات دمرت البلاد....

زعمة ثمة اخطر من هكة في الانترنت ؟

بن علي قال باش يحاسب المفسدين .

ليلى و خواتها و انسابو زعمة يحطهم في الحبس ؟

بن علي قال حرية كاملة للاعلام .

البرنامج متاع سامي الفهري بعد الخطاب ياخي برنامج كوميدي ؟

واحد صاحبي قالي راهو يحب الثورة تخمد و بعد تبدى حملة الاعتقالات و التعذيب و اللي هو حاشتو كان بشوية وقت باش يحضر الخليفة متاعو في عقلو و تتواصل المسيرة و النهب .

زعمة صاحبي موش يحشي فيه ؟

التوانسة اكثر سعادة من الاوروبيين-2

صابر بدى يفدّ ... عزيزة تحلـّت كي الفاشكة .. الماكلة و النوم .. كثر الوحم .. وماعادش لاهية بروحها جملة ...ولا ّت عندها غابة استوائية ... و غابتين شمالية شرقية و شمالية غربية ... امّا صابر برغم هذا فرحان باش يموت ... باش يولـّي بو ... المال و البنون .. قعد كان المال ... ينوب ربّي ... البنون ما عندك ما تقول فيهم ..
پيتر صاحب انجل الجديد قلـّها تخلـّي الصّغير ... قالها مرخوفة .. انجل خايفة ... موش عارفة تطيّح الصغير و لا ّ لا ..انجل قرّرت تخلـّيه ... بالك يدخّللها البهجة على حياتها .. عندها توى 7 شهر مع بيتر ... كعبة كاتاپلازما .. كبّي ... آهاوكة ماللـّزز و برّة ... بيتر ڤطـّع بيها بعد ما جا الصغير بشهرين ... كرّزو حسّ الفرخ الصّغير ... و زيد شاكك اللي هو ولدو جملة .. ما يشبهلوش .. و يعرف اللي انجل ملهط .. و اللي الحجرة ما تذوب .. انجل باش تهبل وحّدها ... كرهت حياتها ... عزيزة جابت طفل زادة ... فرحانة بيه باش تموت ... فطامه في عامين ... انجل تخاف لا صدرها يطيح ... تشرّب فيه في حليب تشري فيه ... عزيزة زادت تحلـّت ... آنجل بدات تتحلّ .. هي من قبل موش زڥالت كيما يحبّو الالمان ... امّا كان تزيد تسمن شوية ... مكهبة عالـ 27 .. و زيد عندها بيبي .. شكون مازال باش يغزرلها ?...
عزيزة عدّات بقية عمرها مع صابر .. حلو ومر حتى يوفى العمر .. زادت جابت زوز بنات ... أنجل عدّات بقية عمرها تلوّج على راجل ... مرّة حبّت تجرب لي افريكان ... سمعت اللي عندهم اكبر حتى من نيلز ... عملت شويّة جوّ .. مشكلتها ما تحبّش تخرج معاه للشارع ... الناس الكل تغزر .. تلبس في لونات شمس حتى كي يبدا الثلج يصبّ .. الافريكان صمرها ... حاشتو بالاوراق ... عارفها جوست تحبّ تعملو عاهرة مذكّر ... ڤلـّها نعرّسو .. في بالها بالنتيجة هذي .. امّها و بوها قطعوها خاطرها مع كحلوش .. باش الناس ما يقولوش عليهم راسيست قالو احنا ماعنـّا شي ضدّ الكحالش امّا نعرفوه يحبّ جوست يقعد في المانيا ... كل ما يزيد نهار تزيد تكبر .. و كل ما تزيد تكبر تزيد تعفـّط ..كان في الدّنيا هذي ما تشيخش معناها حياتها تعدّات ساڥاپا ... عزيزة ايمانها ايمان عجائز ... حتى كان ماكليتش توّى تو ناكل في الجّنة ...حتى كان ما عملتش توى تو نعمل في الجنة ...
الاربعة كهّبو عالاربعين : صابر و عزيزة و بيتر و انجل ...

يتبع

التوانسة اكثر سعادة من الاوروبيين-1-

توّى زعمة علاش احنا ديمة نقلـّدو في الڤورّة ؟ زعمة خاطر احنا نظنـّو اللي هوما عايشين سعداء اكثر منّا؟ علاش اسعد منا ؟الحرية ؟الفلوس؟ الكونفور ؟ الانفراستروكتور؟
هاو باش نثبتلكم اللي احنا اكثر سعادة منهم بالدّليل ....
باش ناخذو مثال زوز نسا .. تونسية و المانية .. انا عشت المجتمعات الزوز .. دُنك نعرف بالظبط على شنية قاعد نحكي ... الزوز نسا يمثلو السواد الاعظم متاع المجتمعات الزوز .. 80 في الماية ... و باش نحكيو عالجينيراسيون اللي اعمارهم توى بين الاربعين و الخمسين .. نتبّعو النسا الزوز ماللي تولدو ... توى كيفاش عايشين ... و كيفاش باش يموتو ... ديمة كي ناخذو مثال ... اما يكون عامّ ... انـّجمو نفهمو خير.


الزوز نسا لاهم مزيانين برشة لا خايبين برشة... في الوسط .. كل شي في الوسط .. الزين .. البدن ( مالقيتهاش بالدارجة لا بالعربية اما برّى نسمّيوها السكساويّة) .. الذكاء(أو البهامة ).. الفلوس .. المستوى التعليمي ..الخ
عزيزة مللي صغيرة ثمة نوع مالحرمان : ساعات تحبّ تلبس حاجات اللي والديها ما ينجّموش يشريوهملها ... انجيلينا كيف كيف... خاطر الطبقة العاملة في اروبا بصفة عامة ما ينجموش يشريو اللبسة دومارك الڥري .. و المذرّح غادي ما يتباعش كونشي تجيبو من پولونيا او غيرها
المشكلة هوما يظهرولنا لبّاسين ... امّا ديمة المشكلة پاراپور لشكون ؟
تكون لابس مثلا كوستيم مقني في حفلة فيها جماعة لابسين قشاشب تحسّ روحك روبار دي نيرو ... يدخلو جماعة عاطينها ڤوتشي و ڥالانتينو تولـّي تحسّ روحك ولـّيت عبد الحميد المْكسْتِمْ .. و المثال هذا يتطبّق على كل شي ... في الزين ... في البدنـّات في الفلوس و العلم و غيرو ...
هذاكة علاش السعادة اللي شعرت بيها عزيزة و اللي شعرت بيها آنجيلينا كيف كيف خاطر مايلزمناش ننساو حاجة مهمة برشة : مثلا :عزيزة كانت تاكل في شكلاطة سعيد ... تعجبها ... آنجيلينا تاكل ديما في الشكلاطة السويسرية ... تعجبها .. كي طاحت عزيزة مرّات بالشكلاطة السويسرية زادت شاخت ... انجيلينا ما عاد تشيّخها حتى شكلاطة في الدّنيا .
نجيو توّى لمرحلة البلوغ: 15 سنة .. آنجيلينا مزيانة .. اما پاراپور لصاحباتها عاديّة برشة .. عزيزة كيفكيف ... آنجيلينا عملت صاحب ... عزيزة يلزمها تستنى حتى يجي ولد الحلال .. آنجيلينا فقدت العذرية مع فرخ عمرو 17 .. هو بيدو مازال ما يعرفش مليح .. امور لامور ماكانتشي حاجة خارقة للعادة . 25 سنة عمر آنجيلينا ... عرفت فيهم 4 ذكورة ... بون ينجّمو يكونو اقل ولا اكثر .. انا عطيتكم المعدّل ... هاو قصير هاو طويل .. هاو مرخوف هاو مكبوس .. هاو مشعّر هاو مطهّر ... هذاكة كان معايا حنين ... لاخر فذلاك .. لاخر أشبّ .. الخ .. آنجيلينا تفرّجت مع صاحباتها في الپورنو و شافت رجال و ز.وب انواع و اشكال .
عزيزة مسكينة كل شي عيب و حرام .. حتى كي كان عمر شريف يبوس فاتن حمامة في التلفزة بوها يبدّل ... و هي تحشم ... ماذابيها تشوف امّا عيب ... حاسّة بالانوثة متاعها اما يلزمها تصبر ... حتى باش تمسّ روحها تخاف .
في الامور الاخرى ثمّة فرق ... آنجيلينا عايشة خير ... عندها الكماليّات اللي موش عند عزيزة
في فترة الطفولة المتأخرة و المراهقة : آنجل سعيدة اكثر
عزيزة خطبها صابر .. وليّد يخدم معاها في المعمل ... كانو ساعات بالسّرقة يمشيو لبالڥيدار.. يتمشـّاو... يشريلها شويّة كاكي ترميهم للقرودة ..و يدور بيها الدّورة بعيد عالعينين و يبوسها ... و يحبّ يتمادى ويبدا يرمي في يديه و هيّ تقلـو يزّي عزيزي .. حتى نعرّسو ..هيّ شاهية ... امّا حرام.
وقتلـّي عملت 25 عرّست بصابر ... و دخل بيها .. اوّل مرّة عزيزة تشوف في حياتها الـ .., و داخت .. ألحقها بصفوف النـّساء ... صابر بيدو مازال ڥيارج ... ڤامط أكثر منها ... شهر العسل عدّاوه في اوتيل بودورو في الحمّامات .. اما بالنسبة لعزيزة وصابر اوّل مرّة يمشيو لـ أوتيل ... كان جنة بالنسبة ليهم ... شبيك صابر دمو سخون .. و هي دمّها حَميم .. كل يوم ما بين 4 و 6 .. للي الشي قريب يمساط ... طيّحو شوية في الرّيتم .. و بعد زادو رجعو كي العادة ...
آنجيلينا في طمبكها .. كمّلت الفورماسيون متلعها و تخدم في ماڤازان عالكاسة .. كل مدّة صاحب جديد ... اما عندها مشكلة كبيرة .. تعرّفت مرّة على واحد اسمو نيلز ... كان كبير .. اكبر واحد شافتـّو ... نيلز بعثها بعد مدّة خاطر لقا شكون ازين منها ... مشكلتها كونها ماعادش ترضى بواحد اقل ماللي كان عند نيلز .. و توماس كان ضامر برشة ... البقية الكل باسلين .. تعرّفت مرّة على واحد عربي .. كان حزّار عليها برشة ... ستاحشت الحزارة متاعو ... كان يقلـّها كي تمشي معايا في الشارع ماتخزر لحتى راجل .. و كان كي يخزرلها واحد في الشارع يڤحرلو و يخرّج عينيه .. كانت ديمة تقلـّو يزّي مالتخلـّف .. اما في قرارة نفسها كانت تحسّ اللي هي انثى و تشيخ عالغيرة متاعو ... قصّتها معاه خاطرو ضربها و ضرب اللي شطح معاها في العُلبة ... توّى هاو عندها صاحب جديد مازالو كي نقـّلو مع بعضهم .. لاهوّ يحبّ يتنازل على عاداتو القديمة .. لا هي تحبّ ... بون .. ماهواش كيما فلان و لا فلان ... و خاصة موش كبير كيما نيلز .. امّا خير من بلاش .. بدات تخمّم .. زعمة بلاش خير ؟
عزيزة ساكنة في دارها الجديدة .. المصروف قدّ قدّ .. صابر عاقل و يصلـّي ... امّا مزال ما شبعش .. هي كيف كيف ... حتى حبلة في الشهر السّابع و ديمة عينها ...
صابر عندو 4 شهر ماللي قلـّها ماعادش تمشي تخدم ... يلزمك تتلها بالصغار توّى ... نعيشو باللي جاب ربّي

يتبع

مادّة الشطرنج عوض مادّة التربية الاسلامية : my blog ردّا على

جيت نكتب في تعليق عالمدونة متاع * خواطر* ياخي تحلـّيت في الكتيبة.
اللي فهمتو سي خواطر يحبّ :
1-ينحّي الباك
2-يردّ الجامعات هي اللي تختار الطلبة
3-يشجّع العلوم الانسانية معناها تاريخ و فلسفة و علم اجتماع و الخ (خاصّة الخ)
و قال:
4-التوانسة ما ينجموش يصنعو خيط ضوّ وحّدهم
5-التقدّم يتحقق موش كان بالتمكّن من العلوم الصحيحة

تعليقي:
1- .. الباك ولـّى لـُعَبْ .
اقتراحي: الباك يرجع صعيب باش كان النخبة هي اللي تقرى في الجامعة ,و البقية تكوين مهني. باش تكون عنا يدّ عاملة عندها مستوى ,و هكاكة في الصّناعات متاعنا و في الحرف ,تتنحّى لغة اللـّيقة تجيب و موش ظاهرة و شكون شافها و عاد شبيه و ليه ليه و الياطاش و الخ
عمركشي ريت معمل فيه 10 مهندسين و 5 حرفيّين ؟
يلزم نسبة المهندسين ما تفوتش في أقصى الحالات 15 او 20 في الميا و ال80 البقية يد عاملة مختصّة هذاكة علاش ما نوصلو لشي اذا كان بلاد بكلها مهندسين . المشكلة في السياسة متاع البلاد اللي كانت مطفـّية الضّو عالفورماسيون ... هاو الزّين عندو مدّة( مْديدة لا محالة ☺) يحكي عليها ... مازلنا ماريناش النتيجة .امّا كان يزيدو في المراكز و راس المال متاعهم ,و يزيدو شوية ريق في قناة 7 عالتكوين, و يعملو پروپاڤندا كيما نعرف في الجرايد و موزاييك و و ...و يردّو النّجار و التريسيان يخلصو كيف الموظفين و الاساتذة (كيما الاوروپ) ... تو تتحسّن الامور. و وقتها يصير التالي :
منتوجاتنا تولـّي خير من منتوجات "الخارج" خاطر الجودة كيف كيف و السوم ارخص (اليد العاملة متاعنا ارخص و التكاليف متاع النقل و الديوانة ما ثمّاش) وقتها الاقتصاد متاعنا يڤطـّع و ماعادش نقعدو معمّلين كان على برشة توريست كحيانين ...
2- مانيش باش انـّاقشك فيها لأهمّية النقاط الاخرى
3- بالعكس في تونس شوف فاك منّوبة و الفاك دي سيونس . تي احنا يلزمنا انـّقصو في التاريخ و الجغرافيا و الـ و الـ .
-الفلسفة : بلادنا بكلـّها فلاسفة ... برّى احكي مع الكوّاش متاع حومتكم تو تسمع الفلسفة الصحيحة ... ڤلـّو ماهو الجسد و ما هي الاخلاق ... حاجة اخرى راهو احنا البشر ماعادش انـّجمو نتفلسفو .. يعني اللي قالوه القدم وصلنا بيه لـالتـّوپ متاع العقل ... يعني تساءلو في كل ّ شي و في حتى شي و ماوصلو لحتى شي. البلاد الوحدة يلزمها اربعة خمسة فلاسفة كان طارت ... موش جيوش تحتل الكيران الصفراء و المبيتات
اقتراح : نسكّرو الفاك متاع الفلسفة و العشرة الاوّلانين في الفلسفة في الباك تبعثهم الدّولة على حسابها لأيّ بلاد يختارها كل واحد فيهم, و نعملولهم سيستام باش بعد ما يكمّلو يرجعو
-في البيداغوجيا و الترجمة و اللغات نمشي معاك ...
- التـاريخ و الجغرافيا و التربية الاسلامية و المدنية انـّقصو فيهم في عوض ساعتين في الجمعة تولي ساعة في الجمعتين و نعوّضوهم بعفسة جديدة : نولـّيو اوّل بلاد في العالم تقرّي الشطرنج في المكتب
ونعملو مادّة اسمها ثقافة عامّة نقرّيوهم فيها التاريخ من غير سخافات و السخافات نقصد بيها التواريخ الفضفاضة (شكون منكم مثلا يتذكّر وقتاش تأسست الدولة الفاطمية ؟) و حتى كان مازلت نعرف آش باش تفيدني ... قدّاش كنت نضحك على صحابي كي كانو يحفظو التاريخ عن ظهر قلب ..
نقرّيوهم زبدة التاريخ ...في عوض الجغرافيا و ارتفاع جبل "كالاوالا" نقرّيوهم عادات المجتمعات و الأعلام متاعها ... نقرّيوهم الايتيكات باش يعرفو كيفاش يتصرّفو و كيفاش يحكيو و كيفاش ياكلو و كيفاش و كيفاش ... كان الوالدين الله غالب عليهم ... هذا و غيرو في مادة اسمها ثقافة عامّة يعملو جوّ و يتزلـّزو في الحياة
و نزيدو مادّة اخرى : قانون الطرقات و السياقة ... باش تقلي يتكلـّفو ؟ نلقاو حلّ مالميزانيات اللي نصرفو فيها على المبيتات و الاساتذة ووو ... متاع الجغرافيا ووو ... و الدولة تعمل سوايع السوقان للتلامذة بسعر ما فيهش ربح ... و تزيد اتدعّم الحكاية .. نسلـّكوها و حتى مالعفسة بيدها تعطي فكرة طيّارة على تونس
نقرّيو الصغار التصميم مثلا ... السّينيما .. تعرف قدّاش ايطاليا تدخّل في جرّة كاڥاللي و ڤوتشى و غيرهم ؟ في بالك اللي السّينيما وحّدها في امريكيا تدخّل اضعاف ما يدخّلوه الكحيانين اللي يجيونا لتونس؟
و في الفاك, حتى العلوم الصحيحة الامور تبدلت ... توى اهم علوم اللي باش تقلب الدنيا هي الهندسة الوراثية و علوم الفيزيك الجديدة و غيرو .. هنا مازلنا بعاد برشة.
4- التوانسة ما يصنعوش خيط ضوّ وحّدهم موش خاطر ما يعرفوش .. خاطر كان انت مثلا تسحق باش تصنع بريكيّة و المارشي اللي عندك متاع 10 آلاف بريكيّة في العام تنجّم تبيع الكعبة ب دينار . الرّوصور الصّغير يلزمو مكينة تصنعو اما سومها 50 مليون و تصنعلك مليون روصّور في العام و انتي حاجتك كان ب 10 آلاف ... تولـّي تجيبهم من برّى (ال 10 آلاف روصّور) ... و تحكيها انت الحكاية لصاحبك في قعدة .. يولي يكتب مدوّنة يقول فيها التوانسة ماينجّموش يصنعو بريكيـّة وحّدهم ... فهمتني أخي
5- جاوبت عليه
ان شاء ما طوّلتش عليك .. هذا رايي ..... و الاختلاف في الاراء باهي ... و ينشـّط
سلـّم على زرڤ الوشمة
سلام

غزوة بدر ... لايڥ

أعرف انـّها فكرة مجنونة .. و لكنـّها نظريّا ممكنة: في يوم ما يتمّ اختراع التالي :
آلة يمكنها الانتقال الآني عبر الفضاء او السّفر عبر المكان بسرعة تفوق سرعة الضوء 1000 مرّة (من غير المعقول التسليم بأنّ سرعة الضوء لا يمكن تجاوزها )
كاميرا يمكنها التصوير بدقـّة على بعد آلاف السّنين الضّوئيّة و يمكنها بث الارسال بنفس سرعة المركبة الفضائية .
ماذا يمكننا وقتها ان نفعل ؟
نبعث بالمركبة الفضائية لتسافر في المكان لمسافة 2010 سنة ضوئية .. ستصل الى ذلك البعد بعد سنة ... ماذا ستصوّر الكاميرا اللتي بداخلها ؟
ميلاد المسيح
و ستصلنا الصور بعد عامين من اطلاق المركبة الى الارض و سنشاهد ميلاد المسيح مباشرة
على بعد 1400 و نيف سيمكننا مشاهدة غزوة بدرة و غزوة أحدعلى بعد نيفين و غزوة منهاتن على بعد 9 سنوات ضوئية فقط ...
حينها سنعرف الحقيقة ... كل الحقيقة .. كيف تحوّل بعض القرود الى بشر ... عصا موسى ...كيف بني الهرم .. من قتل كينيدى ...
واأسفاه ... لن أعيش حتى أرى هكذا اختراع

كاڥيار ... ملا ّ كاڥيار

انا و وليّد صاحبي ساعات تطلعلنا نحبّو نعملو كيف لي ميليونار ... امّا نهارتها تكلـّفتلنا غالية:شمبانيا و الكمية كاڥيار ... المياة ڤرام مالنوع المتوسط اللي ياكلوه الزواولة متاع الغـُنيا سومو 90 اورو ... فرحنا و عملنا طواول و كراسي و قعدنا. الزوز عمرنا ما ذقناه.. و بدينا نتطعّمو .. دارلي صاحبي قلـّي : تعرف على شنية ركبتلي توّى مع هالكاڥيار؟ قتلو انا: حورية متاع عين ... قاللي لا .. مّالا بوق ارض جوّ ... قلـّي لا ... قتلو مّالا سيّب روحك و ڤولها. قلّي هاو باش نسألك حاجة اخرى .. برّى عااااااااد ...قلّي باهي .. برجوليـّة امّا أبنّ ؟ الكاڥيار و لا ّ مرڤاز البهايم اللي كنّا ناكلو فيه في حومتنا ؟ مانحكيلكمش آش ضحكنا ليلتها... و عالفازة عطيناها بوق ماكانش في البرنامج .. الكاڥيار كمّلناه شماتة بركة خاطرو غالي .. و عدّيناها ليلة كاملة :توّى وحيّد هرڤمة في صبّاط الدّزيري خيرلي سهريّة في عـُلبة (معناها بْواطة) .. لا .. كعبات تريليا مشويّين عند كمال سرّة خيرلي من بْلا بْلا بْلا .. سيّبني أنا توّى ركبتلي عالبرويطة متاع باب سعدون : كسكرت و حارة مروّب خيرلي من بْلا بْلا و حتى كان معاهم بْلا .
آخر حاجة قالهالي : يا بابا ملـّة برد البرّة .. توّى صحفة لبلابي خيرلي من كـَلـْب مع پاميلا ..
واحد دزيري نعرفو هبط عمناول لتونس .. طلب مرّة صحفة لبلابي... مدّلو الصانع الخبز ...دارلو الدّزيري ڤلـّو: واش آ صااحبي
tu te fous dma guelle ?