lundi 28 février 2011

هاو القطعان مع الماضي




جماعة القصبة المعتصمين شكون يحرك فيهم ؟
المطالب متاعهم صحيحة لكن ناقصة أهم حاجة ؟
شعارهم قالك القطع مع الماضي ؟
ابطال الاستمناء السياسي متاع احزاب المعارضة اللي كانو يعرفو كان يناشدو و يثمنو
موش ماضي ؟
اتحاد الشغل اللي كان يحب بن علي اكثر من ليلى موش ماضي ؟
كيما التجمع ماضي .. كل من اثبت تورطو مع بن علي ماضي
علاش موش من ضمن الشريطة متاع المطالب متاعكم ماذكرتوش الشابي و ابراهيم و جراد و غيرهم مالخونة ؟؟؟؟؟؟؟؟
علاش ماقلتوش تجميد نشاط المعارضين السياسيين اللي ناشدو بن علي !!!!!!!! ؟؟؟؟؟
علاش ماقلتوش عبد السلام جراد ديقاااج ؟؟؟؟؟؟؟
نسيتوهم هذومة و الا قالولكم طفيو الضو ؟
برشة خوانجية في القصبة ... وبرشة جماعة وراهم أجندا
-
-
-
حاجة أخرى

ثمة أنواع جدد متاع لوبان في تونس 14 جانفي :
ثمة لوبانة يا آرسيديست
اللي يقول رايو ... و يكون ضد الاعتصام يقولولو يا آرسيديست
يا اللي تحب التجمع يرجع يحكم في البلاد
نحب نفهم كيفاش التجمع ينجم يرجع للحياة السياسية ؟
الوجوه الكبيرة معروفة و تحرقو سياسيا
المقرات متاعو الكل باش ياقع تأميمها
عار اليوم و غدوة في تونس انك تقول انا تجمع
الفلوس متاعو تجمدت
عملو مطلب باش يحلوه نهائيا
حتى كان باش يرجع باسم اخر العباد باش يقلبو الدنيا
عبد الوهاب عبد الله - الزواري- الجيلاني-الغنوشي - المبزع جمعتين اخرين
القلال - برهان بسيّس - عبد الغزيز بن ضياء - الغرياني - مرجان
و القائمة طويلة جدا
هذوما الكل باااااااااااااااااي بااااااااااااااااي
تشدو ما تشدوش ... في الحبس و الا اقامة جبرية ... الناس هذومة الكل
و غيرهم برشة ... في الفترة الجاية موش باش يرجعو يمارسو السياسة
الناس هذومة باش يحاربو باش مايدخلوش للحبس ...
غير يسلكوها بركة
باش نقولو الفوضى تساعدهم باش يهربو مالمسائلة وقت اللي الناس تكون لاهية
في الفوضى و العصابات
هوما يعرفو احنا نعرفو اللي عندهم حل واحد : الهروب
و حتى الهروب موش العمر الكل ... باش نجيبوهم باش نجيبوهم
باش تقولو طمس الحقائق : اول حاجة توى بعد شهر و نص : دزو خوه ... الجماعة تصرفو واللي صار صار
ثاني حاجة ثمة محاكمات علنية باش تصير و شهود و غيرو
و اللي باش يسلكها فيهم باش يعدي بقية عمرو في الحبس
معناها يزينا من لوبانة التجمع ... التجمع باي باي
ثمة زادة لوبانة الخوانجية : هنا لوبانة من نوع آخر :
بن علي هو اللي عطاكم فكرة غالطة عالنهضة
النظام البائد كثر الفساد
النهضة حزب اسلامي معتدل
ظلمونا و قهرونا في عهد بن علي
امريكيا و الغرب هوما اللي شوهو الاسلام

يزينا ماللوبان ... و يزي ماليتم ... راكم عملتو العار

شكون عندو مصلحة في الفوضى غير الخوانجية ؟




حكاية جيوب النظام البائد ماعجبتنيش ... شنية مصلحتهم كي تدخل بعضها ؟
الامكانية متاع رجوع مناظر التجمع مستحيلة و هوما اول ناس يعرفو هذا
عائلة بن علي حدّث و لا حرج
جيوب أمنية و أمن الرئاسة كعك مايطيّر جوع : شنية المصلحة ؟
الحكومة هي بعثت المندسين ؟: مايساعدهاش ناس تموت و الناس اللي ماتو نهار السبت نتيجة للجبروت متاع البوليسية اللي برشة منهم يتصرفو وحدهم موش اوامر من عند وزير الداخلية البهناس
الغنوشي البارح مانجمش يقولها ... قال : أقلية و أغلبية
قال فلوس يفرقو فيها عالعباد : و جاهدو بأموالكم و أنفسكم
كان نحاولو نتخيلو المشهد السياسي بعد سقوط الحكومة هذي
ثمة شكون يقول مجلس تأسيسي و ثمة شكون يحب مجلس حماية الثورة مع حكومة انتقالية
و ثمة شكون يحب الجيش يشد الحكم ... 3 امكانيات بـ 9 سيناريوات او اكثر
الوفاق مستحيل يصير خاصة و انو الدستور تم خرقو البارح بطريقة تنفيه تماما
و ماعاد حتى واحد ينجم يقول : طبقا للدستور
نهارت اللي يجيو جماعة يقولو احنا عملنا مجلس تأسيسي .. مهما يكونو الجماعة هذومة
باش تولي اتهامات بالماسونية !! و الالحاد و الشيوعية
وفي الحالة هذي باش نوليو في صراع اديولوجيات و اللي باش يغلب بالطبيعة
الجماعة اللي باش يحكيو بقال الله قال الرسول
خاطر ما ثمة حدّ نادى باستفتاء لانتخاب أعضاء المجلس التأسيسي أو أعضاء لجنة حماية الثورة ...
من غير استفتاء شعبي ... الحرب الاهلية جايينها جايينها ....وقتها الناس ياروح ما بعدك روح
الناس ماعاد تفهم شي ...
و هنا يخرجولنا جماعة بولحية اللي محجمين اللحي و اللي برشة منهم
موجودين في القصبة و يقولولنا الاسلام هو الحل
و نعملو حكم اسلامي *معتدل*
باش يجيو هوما في شكل الحل الطبيعي و الوحيد وقت اللي التوانسة يأيسو و يرضاو بأي حل ...
و الناس بالطبيعة تقبل بالحل *الطبيعي* و يقولو مانا الا مسلمين
صحيح اللي الحكايات اللي ريناهم متاع مظاهرات جماعة حزب التحرير افلام عملتهم
الحكومة ... لكن ما يلزمناش ننساو اللي الخوانجية هذي فرصتهم و البارح كانلهم انتصار كبير
و اذا كان باش نخليو جماعة القصبة يهزو بلادنا للهاوية ..
نكونو وقتها جبناها لرواحنا
و مانلومو على حد
علاش ما نعملوش اعتصام ضد الاعتصام
و في القصبة بالذات
مع الحكومة
و خلي يقولو ارسيديست


الله لا تربحك يا غنوشي يا جبان
..

dimanche 27 février 2011

قايد السبسي و قايد تات الامبوط


علاش هكة يا غنوشي؟
علاش مانجمتش تقول كلمة لا لبن علي من عام 99 ؟
علاش قبلت باش تكون رئيس حكومة نهار 15 جانفي ؟
علاش قتلتنا بالكذب و المماطلة شهر ونص و ماعملتش حاجة تنفع البلاد بالحق ؟
علاش أناني و حبيت تخرج بتصويرة البطل؟
علاش جبان و ماقلتلناش شكون و كيفاش و علاش؟
علاش تعرف كل شي و خليت بلادك باش تدخل في حيط ؟
علاش و علاش و علاش ؟
-
-

الغنوشي هاو مشى
هذي ولات فوضى يلزمها تاقف
قايد سبسي و الا قائد تات الامبوط
ثمة انتخابات جاية في جويلية
ثمة دستور باش ينقحوه بطبيعتهم
الحكومة الكلبة عارفينها تحشي فيه
لكن ماثماش حل آخر
ثمة ناس متكالبين عالسلطة باش يقدمو برامجهم
و الشعب يختار كلب - حاشى اللي مايستاهلوش
باش نصلحو البلاد يلزم بالشوية بالشوية
علاش العاطفة غالبة علينا ؟
في ليلة و نهار نحبو بليو كالنورويج ؟

لواه مجلس الخرى ؟
علاش هكة بربي حرقتولي أعصابي؟
بلاد داخلة في حيط
نوليوشي في طنزانيا ؟

اش معناها 3 الاف واحد في القصبة يدخـّـلو البلاد في حيط بحجة الحرية؟
شكونهم هذومة ؟
باهي ... نهار اخر 3 الاف خوانجي يرڤدولنا في القصبة يحبو يعملو نظام خلافة في تونس
مالا الشعب يقعد ساكت ؟
3 ألاف شيوعي
يرڤدو في القصبة يحبو يرجعونا لـ 1917 نولي أنا نعيط لبابا رفيق و أمي نعيطلها الرفيقة ؟
جيت نحسب فيها بكري دخت
عندك 2 مليون دينار ... تنجم تقلب نظام الحكم في تونس
نهار آخر يجي واحد ميليونار يلم 3 الاف واحد مالشارع
كل واحد يخلصو 15 دينار في النهار
ماكلتو و شرابو و دخانو 15 اخرين
و يرڤدولنا شهر في القصبة
يتكلفولو 2 ميلياردوات
و يشوف هكة شوية مطالب قال شنية شرعية
و يقلبو أركان الدولة ... هذي دولة يا حيوانات ... عندها هيبتها
نتحدّى أي واحد يعطيني سيناريو واحد حتى يكون مالخيال تنجم الحكومة ترجعنا لتالي
الميديا مستحيل ترجع كي العادة
القانون باش يتبدل و تولي ثمة حريات
تونس باش تولي دولة القانون و المؤسسات بالرسمي
التجمع مستحيل يرجع حتى باسم آخر
مرجان و الا الشابي و الا اي كلب مشكوك فيه كان يشدو هوما تصير ثورة أخرى
كيفاش باش نرجعو للي كنا عليه ؟
أعطيوني سيناريو واحد
المهزلة هذي يلزمها تاقف
و كيما يلزمنا نقضيو عالتجمع
يلزمنا نقضيو عالفوضى
مهما كانت النتيجة

شعــــب حقــــــــــــــــير 1



الصفات اللي تأكدت منها في الشعب التونسي ماللي بدات الثورة لليوم هي
النفاق و البغض والحسد النذالة و السذاجة و الطمع و التجوبير
و هنا باش نعطي بعض الامثلة على سبيل الذكر لا على سبيل الحصر :
-
-


النفاق : النفاق يتجلى مثلا في لغة : عميل للامريكان ... و الصهاينة و الفرنسيس
نورمالمون مصلحة تونس تقتضي انو الحكومة تكون عندها نوع مالتبعيّة و العمالة للغرب
ويني الواقعية ؟ علاش احنا ديمة شعارنا البصّ و الزّهير؟
علاش نكذبو على رواحنا ؟
كي باش نعاديو الغرب ... باش نربحو حاجة ؟ علاش نعاديو فيه الغرب جملة ؟
قاعدة عسكرية في بنزرت ؟ ويني المشكلة ؟؟؟ اذا كان الشي هذا يرضي علينا الامريكان
كرامتنا ؟ تي احنا غاطسين في الذل و مانخرجو منو كان مانوليو بالرسمي ند للند
مادامنا مازلنا ضعاف ... نبوسو الكلب من فمو ... وماناش أحنا اللي باش نحررو
فلسطين ... و انا واحد من الناس تهمني كان تونس ... لا وحدة عربية لا مغاربية
لا تات الامبوط .. مانحبش نتحد مع العرب المتخلفين ... انا راسيست ... احنا
طايرين عليهم ...
و اللي باش نتروخصو بيه و نطلبو الوحدة العربية باش شيوخ الوبنة متاع الخليج
يقولولنا انتوما طامعين في فلوسنا ... نتروخصو بيه مع الغرب خير ...
لكن
وين الفرق ؟
الفرق انو الحكومة تستغل الطحين و الرخص و التبعية لمصلحة تونس
مثلا : في مقابل القاعدة العسكرية و الامور الكلها
امريكيا تعطينا قروض كبيرة بفوايد صغيرة ... شوية اسرار صناعية - موش متاع الـ آف 16 - اما
حاجات ماتتعطااش نورمالمون ... يعطيوهملنا باش نأسسو صناعة في تونس
الشركات الامريكان يعملوعنا مشاريع عملاقة و استثمارات ...
العمالة و التبعية تاقف عند حدّ
أمور تضرنا كيما النفايات اللي يحبو يرميوها عنا ... الخ
معناها يلزم الحكومة العميلة تكون مصلحة تونس عندها فوق الاعتبارات الكل ...
موش الطحين و الرخص و معاهم ملاليم ....و يزيدو السياسيين يحطوهم في جيوبهم
حجمنا كدولة صغيرة يخلي دورنا نيڤليجابل في المنطقة بكلها
هذاكة علاش ماعنا مانعملو لخواتنا في فلسطين
و ما عنا ما نعملو لاعدائنا الاسرائيليين
اما اللي في الڤلب في الڤلب


-
-

البغض: مصطلح مصنوع في تونس و اكيد باش نسمعوه في باقي الدول العربية
المتخلفة اللي باش تثور : الركوب عالثورة
واحد كيما منصف المرزوقي قالولو تحب تركب عالثورة
سهام بن سدرين كيف كيف
طارق المكي - و نعرف اللي هو انتهازي و نكرهو - كيف كيف
نهار آخر توفيق بن بريك كان يمدّ وجهو أكيد زادة باش يقولوهالو
زهير اليحياوي الله يرحمو كان يقوم من قبرو توى يقولوهالو
و هذا من غير ما نحكي عالناس اللي ماكانوش مناضلين في وقت بن علي ..
شكون اللي من حقو يركب عالثورة ... كي الثورة ماقادها حدّ و جات عفوية ؟
شكون مالا باش يركب عليها الثورة ؟؟؟؟
شكون باش يشد المناصب ؟
كي مايركب حدّ عالثورة آش باش نعملو ؟


-
-
الحسد : واحد كيما سليم عمامو ... مناضل .. مثقف ... حطوه كاتب دولة
..بقطع النظر الحكومة هذي شنية .. هو اش قال .. حقو و الا ماحقوش قبل المنصب ... الحرب اللي شنـّوها عليه
ماعندها حتى تفسير كان الحسد
-
-

النذالة : أبطالها الى حدّ الان رشيد عمار .. عمّ فرحات وزير الداخلية ... نجيب الشابي يرحم عمّي و هاك الفحّام بن براهيم ...
و هنا ما نحبش نحكي عالثنائي متاع المعارضة خاطر مانجم نعبر كان بال
كلام البذيء
و انا مانحبش نستعملو برشة ...
عمار-فرحات عندهم النذالة و باش نفسرها في النقطة متاع السذاجة
-
-
السذاجة : شريحة كبيرة مالمجتمع و اولهم المعتصمين في القصبة و المتعاطفين معاهم
و الجماعة اللي طايحين غرام مع عمّ فرحات و سي رشيد عمار
اول حاجة الاعتصام موش وقتو .. يلزم نصبرو جمعتين اخرين .. انا ماتجينيش غريبة اللي الحكومة هي اللي شجعت عالاعتصام هذا ...
في الوقت هذا ..
الفوضى هي الوحيدة اللي تمكنها باش المبزع يقعد مبزع في قرطاج بعد 14 مارس .. و التصعيد اللي شفناه ماهواش صدفة

عالاقل كي نخرجو نهار 15 مارس و نقلبو الدنيا .... و نڤربعوها .... عنا علاش ... و ماثمة حد ينجم يقول فاش قام ... نقولو قام و قعد ... الدنيا راضت و الحكومة خالفت الدستور
السذاجة زادة اللي شريحة كبيرة مثيـّـقة الدّيو فرحات-عمار .
و الجيش ... الجيش ... يحيى الجيش .. و الاغلبية عندهم ثقة في الجيش
. .. الجيش مستحيل كان ينجم يقمع التوانسة
موش على كيفو ... ماهياش مسيبة ... و ماناش في الغابة ..
الثورة متاع تونس هي الاولى و مايجيش نقارنو اللي صار في تونس باللي صار في مصر او ليبيا او غيرها ... اللي صار في تونس استثنائي و فيه برشة ارتجال
و ارتباك حتى في الغرب
ثمة ظروف داخلية و خارجية انا واحد مالناس نجهلها ... لكن اللي متأكد منو اللي
عمار ماينجمش يكون بطل
و هنا ثمة زوز امكانيات :

1- الكوادر متاع الجيش اللي ماتو في الطيارة كانو ناوين يعملو انقلاب و عمار هو اللي حشاهالهمو هذاكة علاش بن علي جازاه و حطو في العلالي
2- الحادث عفوي ..او انهم كانو بالحق ناوين على حاجة اما عمار مامدخلوش . و هنا نلاحظو اللي احنا في تونس عمرنا مادخلنا حرب ... و الجيش ماعملش عملية كبيرة في الخمسين سنة اللي فاتو
... باش توصل للرتبة متاع عمار يلزمك تكون لحّاس و طحّان ...
و بنفسجي بامتياز
عمّ فرحات الشهلول البحبوح هو باختصار اختيار طاير مالغنوشي اللي عرف يجيب
واحد ينجم يعديها عالتوانسة
مانتصوّرش اللي الغنوشي باش يحط لروحو شوكة في حلقو ... بيدّو
و ماتتصوروش اللي واحد في تونس يعمل حاجة من غير ما الاشباح يوافقو
و مانتصورش هتلر بيدو يجي يعزل الزنوس الكوادر متاع الداخلية و يحل التجمع و يقعد وزير و ماياكلش كرطوشة

-
-
الطمع : هنا ماعرفتش آش نسمي التكبيشة الموش نورمال متاع برشة ناس في حكاية
استرجاع الاموال المنهوبة ... توى بكلنا متفاهمين اللي هي فلوس الدولة ... و يلزم تأميمها
... و لكن حالة الهستيريا اللي نشوفو فيها و العباد تحكي عالممتلكات و الفلوس و غيرو تخليني نسميه
طمع ... خاطر الاهم في تونس موش استرجاع الفلوس اللي أغلبها عقارات و شركات
موجودة في تونس ... و عاجلا ام اجلا باش ترجع نسبة كبيرة منها .. باش نرجعوها
اهم شرط هو الاصلاح السياسي السريع ... و هنا نرجعو مرة اخرى للسذاجة .. و الشعب اللي يقبل في الحرابش متاع الحكومة
و يتبع في الاخبار متاع جيبان الفلوس ... بالرغم اللي هو ظاهريا يكذب في الاخبار الكل ... لكنو
يتبّع بـ - نهمْ -... و مخدّر .. تقولش عليه القدافي يقصد في التوانسة بحكاية حبوب التهلويس
-
-
التجوبير و التڤوعير : اللي يتجلى في برشة مواقف نشوفو فيها في الميديا و عالانترنت
حرية الراي ولات سبّان و ديڤاج و كلام كي الظلام و اللي أثبت اللي مازلنا بعاد برشة ...
وقتلي نشوفو اللغة اللي يحكيو بيها بعض المحامين و الاساتذة و غيرو ...
-
-

اخر نقطة : حكاية انو البنفسجية البارح عملت برنامج عالقصبة ضد رغبة الحكومة
و اللي البث قصوه بأوامر عليا خاطر الجماعة خراو فيه بحرية التعبير
الحكاية موش داخلة مخي .... حتى طرف
البنفسجية لونها مايتبدل كان ما بالحق نوليو دولة ديمقراطية
لكن زادة حتى كان هذا صار ... موش باش يكون بالصفة الراديكالية اللي شفناها البارح
-
النقطة اللي بعد النقطة الاخيرة : شعب حقير نقصد بيها الشريحة اللي تتحلى بالصفات اللي قلتها
النسبة قداش ؟: الايام الجاية توى تورّينا
انا توى تفرهدت شوية كي عبّرت
ومحلاها حرية التعبير



samedi 26 février 2011

شبيـــــــــكم خايفين يا مدوّنين يا مڤوّشين ؟؟؟

-
-
لاحظت اللي من نهار 14 جانفي ... المدوّنين اليساريين ساكتين ... راكشين ... خايفين ....
ياويلـْهم يجيو ضد حكومة العار اللي الناس الكل تعرف اللي هوما ناوين عالخنن ...
و من جهة أخرى خايفين مالمدّ متاع الخوانجية .... و يخافو كان الحكومة تطيح ثمة امكانية
كونو الخوانجية سلطتهم تزيد تكبر في البلاد ..... و شعارهم هنا : رجوع الدكتاتورية
و لا الخوانجية
و يكفيهم كونو ارتحنا من بن علي و عايلتو ... الخوف تنحى ... التجمع كلى ضربة
تقسم الظهر ... و لات عنا نوع مالحياة السياسية ... الاعلام تحرّر شوية ... الخ
انا زادة نفس الشعور .. لكن ما يكفيش .. انجمو نحققو أكثر ... . رايي انو الاعتصام و التظاهر موش وقتو ... يلزمها تلحم بعد جمعتين خاطر الحكومة ناوية تمدد للمبزع بعد 14 مارس ... و المتظاهرين باش يكون عندهم سبب معقول ... وقتها يلزمها تلحم بالظبط ... و في الجمعتين هذومة يلزم التأليــــــــــــــــــــــب .. و حشد العباد ... . يلزم المدونين يتحملو مسؤوليتهم ... و اللي عندو خيوط يجبدهم ... و اللي عندو أدلة يوريهم ... و يزي مالخوف مالخوانجية ... ماتخافوش ... الخوانجية قلــّــة قليلة
مايجيوش 1 في المائة مالشعب ...
و اللي تشوفو فيه عالانترنت يتسمى الجهاد الفايسبوكي
كل خوانجي يعمل بالـعشرة بروفيلات ... و ليل نهار و هوما التعاليق متاع تونس
دولة مسلمة و الله اكبر و يستشهدوا بالايات و غيرو و اللي يشوف يقول تونس خلات بالخوانجية
المشرفين متاع الصفحات أغلبهم خوانجية و خاصة : الحقائق الخفية و ابتسم سيدي
بوزيد ... هذومة متأكد منهم
زيد الادمنوات الاخرين من قوة الظغط متاع الجهاد الفايسبوكي ولاو يتبعو في الموجة
باش بأكثر فان
لذا ... يعيشكم ... يزيونا مالخوف ... راهم ماعندهم وين يوصلو ... و هذي فرصة
ماتتعاودش باش تونس تكون بالرسمي حرّة
اكشفو المؤامرات ... اكتبو ... حلــّلو ... اعطيونا حلول عملية ... خلــّــيو
الخطاب متاعكم يكون شعبوي باش الناس الكل تفهم و المدونات يقراوها الناس الكل
و يفهمومها ... موش وقت شعر ... موش وقت أدب ... و موش وقت فلسفة
و خاصة ماتخافوش لا الخوانجية يركبو ... الشعب التونسي بكلو بالمرصاد

vendredi 25 février 2011

سليم بورنـــو .. دعوة الى اغلاق المساجد في تونس ... و أشياء أخرى

سليم عمامو .. شــُهر سليم بورنو ... اللي خرج مالحبس و ولى كاتب دولة
زملاؤو المدونين فادّين منو ... ثمة اللي حڤروه و ثمة اللي هاجموه ..
برشة توانسة زادة فادين منو خاطر ماحبش يصنصر البورنو ... و هذاكة علاش سمّاوه
سليم بورنو ... توى العباد فهمت علاش مكرزين ... اما المدونين ضدو ؟ علاش ؟ غيرة ؟ اشياء اخرى ؟ هذا و ذاك ؟ ملا حكاية !!
توى كي نجيو نخمّمو : يا اما ماثماش تصنصير جملة كيما قال هو ...
او اننا نصنصرو كل ماهو ضد الاخلاق متاعنا و تقاليدنا و يضر تونس ...
المواقع السلفية التكفيرية المتطرفة ... نصنصروها و الا لا ؟
كان باش نصنصرو البورنو ... معناها باش تكون ثمة حاجة اسمها تصنصير ....
مانا زادة يلزمنا نعملو نفس الحكاية مع المواقع التكفيرية ...
و بالشوية بالشوية نوصلو لمواقع قال شنية ضد مصلحة الشعب التونسي ... وتجي الحكومة
تسكرها .. وهي في الحقيقة مواقع معارضة ..
و نرجعو وين كنا....
انا نقترح انو
الحكومة تعمل سوفـْـتـْـوار ممكن تحميلو مجانا لكل عايلة او كل مواطن
يحب يسكر المواقع الاباحية.... خاطر عندو صغار او اسباب اخرى ..
الليستة متاع المواقع اللي باش تكون الحكومة ناوية تسكرها تحطها في السوفتوار ....
و تعملو اشهار في التلفزة .... و تورّي طريقة استعمالو ....
و من غير ما يقولولو مواقع اباحية .. ينجمو يقولو المواقع الغير مرغوب فيها ....
و اهاوكة المواطن يكـْـليكي عالخيار متاع المواقع الاباحية بكلها ....
و كان يحب يزيد يحط مواقع اخرين ....
و طاح الكاف على ظلو ...
وفاتشي المشكلة ؟
برافو سليم ... و الجماعة اللي غايرين منـّك .. احڤرهم

-
-
-
حكاية أخرى :
ظاهرة جديدة تدعو الى الغثيان ... تتمثل في لموضة جديدة في تونس و اللي هي
الصلاة في الشارع ....
علاش غثيان ؟
ـ اوّل حاجة التقليد متاع المصارة او اي شعب آخر من قبل التوانسة يحبطني
خاطر أحنا الاوريجينال ...
أحنا اللي بدينا ...
أحنا يقلدونا .... و مانقلدوش ....
ـ النفاق : الجوامع مكدسة في تونس .. زنڤة زنڤة ... علاش تصليو في الشارع ؟
ـ حتى اعتصام الخرّ طرّ اللي مطالبو شـْـريطة كاملة ... و اللي مستحيل تتحقق
و اللي ممكن النتايج متاعو تكون عكسية الله لا تقدر ... الاعتصام سمّاوه ....
جمعة الغضب !!!! من قلة الاسامي ؟ باش تنطقوني ؟ علاش نقلدو
في غيرنا و قتلي أحنا هوما الاوريجينال ؟؟؟؟
- الجماعة اللي ولاو يصليو في الشارع .. اش قولكم كان نسكرو الجوامع الكل
؟
طقسنا ديمة دڤلة ... هاو توى الطقس بارد وبرغم هذا تصليو في الشارع
-
-
حكاية تابعة الحكاية الاخرى :
هالمتدينين الجدد
اللي يصليو في الشارع
و اللي يسكّرو في -عباد- الله ڤش في الولايات الكل ...
اللي بداو يطلـّـعو في ڤرونهم ...
حاجة وحدة باهية عملها زعبع في 23 سنة
اللي هو ذلــّــكم ...
و ماخلاكمش تتنفسو ...
خاطركم موش متاع حرية ...
و اللي نشوفو فيه كيما حكاية الصلاة في الشارع ...
راهو يبداها واحد بركة ... و الا زوز ... هيا ياجماعة نصلــّيو ...
الناس يحشمو
و حتى اللي على جنابة يولي يصلي ...
و اللي عمرو ماصلى يولي يصلي ..
وين ؟

في الشارع!!!!
هذاكة علاش الجماعة هذوما

اللي مايجيوش حتى نص في المائة مالشعب التونسي
يلزمنا نوقفوهم عند حدّهم ... مهما كانت الوسائل ...
ماكانش باش يعملو فتنة كبيرة في البلاد
و كان نصبرو عليهم شوية بركة ...
ياكلونا ماكلة .

-
-
و يقولولي علاش مكرّز

jeudi 24 février 2011

نعم للتدخـــل العسكري الامريكي في ليبيا


منذ قليل طالعت على شاشة العربية خبرا يفيد بأن البيت الابيض لا يسبعد
الخيار العسكري في ليبيا
و ما راعني الا ان الفايسبوك التونسي الرديئ يعارض و يندد بالتدخل الامريكي
و التعاليق تنحصر في نقاط معينة :
ـ ماصار في العراق و افغانستان
ـ السيطرة على البترول
ـ ستنقضي على الامريكان
و هنا ... لا يسعني الا أن أستعين بلهجتنا الدارجة اللتي أعشقها و لا يمكنني التعبير عما يخالجني ...
الا بمفرداتها

شعب ... شطر غالبة عليه العاطفة .... و شطر منافق ...
برشة يحكيو بلغة : هذي باش تكون المقبرة متاع الامركان و يا فلسطين هانا جايين و الخ
... شي يعمل العار
باش باش تحرروها فلسطين ؟ بالقنابل النووية اللي عند الصومال ؟
شنية الحل في ليبيا ؟
تتصوّرو ان القدافي العظيم ملك ملوك افريقيا
اللي غلب القوى العظمى و اللى عامل النظرية العالمية الثالثة باش يخاف مالعقوبات الاقتصادية و التنديد متاع بان كي مون ؟
تتصوّرو ه باش يوقف المجزرة خاطر الليبية نقصو ماللي كانو 5 ملاين و لاو 4 بركة ؟
شكون ليهم الليبية ؟
شكون باش ينقذهم ؟
رشيد عمار ؟
خادم الحرمين ؟
الميلياردارات متاع الجيش المصري ؟


-
-

الامريكان و الغرب اليوم في ورطة كبيرة
من جهة يحبو ليبيا تتززّر .. با ش تكون عبرة للخليجيين اللي بداو يتململو
و من جهة فضيحتها اللي تستنى فيها
لكن نتصور في الفترة الجاية حتى المعارضة في امريكيا و الغرب باش تطفي الضوّ
اهوكة في سبيل المصلحة العليا للبلدان متاعهم يجبدو الحكاية كان قبل الانتخابات بشوية
اما توى مايساعدهمش ... حتى كان كلامهم باش يقرّبهم للسلطة ... هاي الوطنية بالرسمي
-
لكن هذا مايمنعش اللي ثمة بعض اللاوطنيين من المعارضة في الحكومات الغربية باش يقولو للاحزاب الحاكمة : كيفاش صارت حروب
في العراق و افغانستان بدعوى تحرير الشعوب
و ليبيا اللي هي شعب مسالم قعدويتفرجوعلى الدكتاتور متاعها
يعمل في ابادة جماعية
الغرب مظطر ...
بالسيف عليه... ....
و بالسيف عليه ... و من غير ما نقاوموه .... يخرج من ليبيا بعد مايموت القدافي
بالنسبة لفلوس البترول ... الغرب كان ياخو في شطرها ....
و هنا ثمة زوز امكانيات : .
كان الليبيين ماتفاهموش في مرحلة مابعد ملك الملوك
ممكن يقعد الغرب ياخو في شطرها
اما كان تفاهمو تتحشالو .....
و يقعد ياخو كان في شطرها
و صاحب الشطر موش خاسر

يسألونك عن الاعتصام قل فيه مضــــــــرّة ومنفعة لتونس ومضرّتو أكثر من نفعو

هذا انا نسميه اعتصام خرّ طرّ
ماللي كنا في واحد من اقوى الانظمة الدكتاتورية البوليسية و الطـّـحينية في العالم ..
نحبوّ في ليلة و نهار ... او بالاحرى شهرين .. نولـّـيو كيما البلدان السكندينافية في نظام الحكم
أولا : الاصلاح ما ينجــّم يكون الا على مراحل
ثانيا : الحكومة الحالية وراها أشباح مانعرفهوهمش .. عندهم الفلوس و السلطة و العلاقات في الداخل و الخارج و السلاح
ثالثا: المطالب برشة ... اكثر من مطلب واحد تولي عـــْـدم
حسب رأيي نكتفيو بمطلب واحد في مرحلة اولى اللي هو مثلا استقالة الغنوشي ..
او الغنوشي و البكوش مع بعضهم
اهاوكة زوز في خوتة ...
و الظغط متاع الاعتصامات و المظاهرات يجيب وقتها نتيجة ...

خرجو الكلاب الزوز؟ نشوفو شنية المطلب اللي بعدو .... و هلمّ جرّا
صحيح اللي الحكومة كل مايزيد نهار كل ماتزيد تنجح في اللي تحب توصلــّو ..
لكن توّى ماعنــّاش برشة خيارات و الشهر و نصّ اللي تعدّاو طمسو فيهم برشة
حقائق ... و أدلة تورّطهم في الفساد ..توى بعد شهر و نص اللي حج حج و اللي عو ذق عو ذق
مطالب كيما استقلال القضاء و لجنة تقصي الحقائق و غيرو امور تنجّم تصبر خمسة شهر أخرين و ماهياش مصيرية في الوقت الحالي ...
أهم حاجة نبدّلو الدستور و المجلة الانتخابية

رابعا : من باب المستحيل كوْنو الحكومة تستجيب للمطالب هذي
الحكومة موش باش تسقــّط روحها بروحها معناها حتى كان باش نطلبو حدّ
نخاطبو الجيش ديراكت هو الوحيد اللي ينجم يطيــّر الحكومة
و بالنسبة للجيش راهو زادة موش مضمون أنو يضمنلنا الامور تمشي كيما نحلمو
خامسا : حزب التجمع باش يتحل اليوم و الا غدوة . عم فرحات عمل مطلب في حلانو
و اذا كان جماعة التجمع لقاو ثنية او ثغرة في القانون باش الشي هذا ما يصيرش او انهم يرجعو باسم اخر... ماناش باش نقعدو نتفرجو و نأكدلكم اللي الشـّـُـعَبْ و مقرّات التجمّع بكلها تتحرق
سادسا : المظاهرات و الاعتصامات تنجم الحكومة تزيد تشعّلها و تكثر الفوضى
و هذا ما يمكــّـنها باش تزيد في عمرها طبقا للدستور اللي يقول المبزع رئيس مؤقت
مدة 45 حتى 60 يوم -
معناها مازالــّـو 3 جمعات اخرين -

الـ 3 جمعات يحبو يردوهم 3 شهر و الـ 3 شهر 3 سنين ... مالا يلزمنا مانعطيوهمش الفرصة
سابعا : الناس تحب الفلوس ترجع توّى .. القضاء عالفساد توّى .. و كل شي توى
بالنسبة لي
المهم اليوم هو قانون الانتخابات و تاريخ واضح للانتخابات و أسامي المترشحين و برامجهم . البقية تعملو الحكومة اللي احنا باش ننتخبوها

-
-

أحنا توّى في دوّامة و زخم كبير متاع أخبار و أحداث و مؤامرات تعمل فيهم حكومة
الالتفاف و الاشباح اللي وراها
اللي باش نعتصمو بيه باش تسقط الحكومة و يجي مجلس تأسيسي الله أعلم وين باش يهزّنا
نعتصمو بمطلب واحد و واضح و ظاهر ... موش شــْـريطة متاع مطالب مستحيــــل تتحقق
هذا من جهة
و من جهة اخرى مهمّة برشة
الاعتصام هذا ممكن ياسر النتائج متاعو تكون عكسية و كارثية
و على سبيل المثال
و ان شاء الله نكون غالط :
الحكومة تعمل كارثة في وسط الفوضى على غرار ليبيا .... و الغرب يساعدو
الشي هذا يصير باش بقية الشعوب اللي تحب تثور يقولولهم شوفو تونس آش صار فيها
بوتفليقة و القدافي ممكن يعاونوهم باش الشيئ هذا يصير ( بالرغم اللي القذافي لاهي في همّو لكن كي يظن اللي الليبية كي يشوفو تونس ولات دمار ممكن يتراجعو أو عالاقل هو يمشي في بالو هكة ... خاطرو في وضع يعمل فيه اي حاجة حتى كان الامل ضعيف )
- ممكن يعملو تفجيرات او غيرو قال شنية جماعة ارهابيين و بلا بلا بلا ... و يكون هذا اتوروت باش ترجع القبضة الحديدو نرجعو وين كنا
- الفترة الانتقالية تنجم تتطوال في عوض 6 شهر ... تولي الدوبل او اكثر
نتمنى الناس تشد ديارها و كان باش تعمل اعتصام نقلهم رانا جايينها جايينها نهار 15 مارس ... توى موش وقتو و مطالبكم برشة ... و مستحـــــــــــــــــيل تتحقق


mercredi 23 février 2011

النورمال و المــــــــــــــــوش نورمال

الاحزاب نورمالمون تصلح مثلا في بلاد كيما لبنان :
بلاد سكانها مقسومين 3 طروف كان موش أكثر
سنة و شيعة و مسيحيين
اهاوكة كل طرف يعمل حزب
تونس 99 في المائة مسلمين سنة عرب و نتكلمو لغة وحدة
عنا امازيغ و عرب كيما المغرب و الجزائر ؟
افارقة و عرب كيما موريطانيا و السودان ؟
قبائل كيما ليبيا؟
أقباط كيما مصر ؟
أمراء و شيوخ وَ بـْـنة كيما الخليج ؟
اكراد و سنة و شيعة كيما العراق و سوريا ؟
حوثيين في اليمن ؟
بلادنا اوريجينال
تونس أكثر دولة عربية ( و من بين الدول القلايل في العالم ) موحّدة في الرّاتسة و اللغة و الاديولوجية
بالنسبة لحكاية الاديولوجية
في تونس عنا النورمال و الموش نورمال
و هوما النقيض و النقيض الاخر
النورمال هوما اللي الجماعة الاسلاميين يسميو فيهم برشة أسامي :اللائكيين و العلمانيين
و اليسار و الشيوعيين و الكفار و غيرو
في الجماعة النورمال اكيد ثمة متطرفين هكة والا هكة لكن المشكلة هنا في الاعلان: شكون
اللي يعلن على توجّهاتو الايديولوجية جْهار ؟
اللي ما يُعلن شيئ ... يتسمّى نومال : كيما مصطفى بن جعفر مثلا
ممكن ياسر يكون مووووش نورمال اما ماعملش الغلطة متاع حمة الهمامي مثلا
الشعب التونسي بكلو نورمال و كي نقول بكلو معناها 96 في المائة او اكثر
البقية اما اسلاميين سلفيين او ملحدين شيوعيين
نقولو 3 في المائة الاولين و 1 في المائة الثانين
و راهو 3 في المائة خوانجية برشة ناس باش يضنوهم شوية
3 في المائة معناها 300 ألف واحد لحيتو تتدلدل في تونس
و ماركة قميص و سواك و كحل في العينين
ثمة جماعة باللحية تلقاها خفيفة ماركة يحب يحسس روحو اللي هو ملتزم
حاصيلو السلفيين ظاهرين يعيطو يابابا يامّي
النساء المتدينات في تونس برشة منهم يتبعو في الموضة متاع الحجاب
و برشة لبسو الحجاب خاطر مانجموش يتبعو الموضة الاخرى
و بررررررشة لبسوه يحبو يعرسو و يتهناو
و النساء السلفيات في تونس نادرين (نادرات) برشة
معناها مانهوّلوش الامور
السلفيين المتطرفين اللي هوما اقلية و الشيوعيين اللي هوما اقل مالاقلية الاولى و اللي مازالو عايشين في ايامات الثورة البلشفية باش يحلو فينا حرب ؟
ناس متطرفين كيما جماعة النازيين الجدد في المانيا نخليوهم يعملو أحزاب ؟
نورمالمون كان تناكت يعملو جمعيات
جمعية المتطرفين الاسلاميين
و حمعية الشيوعيين الملحدين
بقية التوانسة الكل نورمال
ثمة اللي مايل شوية عاليسار و ثمة اللي طايح ياسر عاليمين
المشكلة انك تقول الشيئ هذا و مادام محتفض بيه لنفسك راك مع النورمال
حاجة اخرى مهمة ياسر

كلمة أحزاب في حد ذاتها انا نراها زايدة
ثمة حكومة تخدم و ناس أخرين يلزم يكون عندهم سلطة يراقبو الحكومة
كلمة أحزاب و الاحزاب في حد ذاتها تعطي الانطباع اللي احنا دولة
فيها اكثر من ديانة و اكثر من راتسة
احنا اوريجينال بنسبة أكثر من 90 في المائة و النسبة هذي نادرة في دول العالم
يلزمنا سيستام جديد كيفنا اوريجينال
و هذا بالطبيعة يلزمو برشة وقت
لكن في الاثناء : المتطرفين الكل على برّة و ماتقولوليش : لا للاقصاء

الانتخابات الرئاسية في تونس بالـــ آس آم آس

أوّل انتخابات رئاسية و تشريعية في التاريخ عن طريق الـ
SMS
بدات ..في تونس ..... موش في امريكيا ... موش في النورويج و موش في اليابان .
آش قولكم كان في المستقبل نقراو جملة كيما هذي في كتب التاريخ؟
الحكاية عمليا ممكن تطبيقها
- الحكومة تعمل أرقام خضراء مجانية
- كل مترشح للرئاسة او غيرو عندو نومرو أخضر
- كل مترشح يبعث ممثل عند
les trois fournisseurs
اللي هوما اتصالات تونس تونيزيانا و أورونج
-قانون ردعي بخطية مالية كبيرة لكل واحد يصوّت اكثر من مرّة خاطر ثمة شكون عندو أكثر من خط .... بالرغم اللي الكوارت سيم بطبيعتهم مسجلين الكل بنومرو بطاقة التعريف معناها اللي نومرو بطاقة تعريف متاعو يتعاود اكثر من مرة الاورديناتور يطلعو اما اهاوكة باش نتجنبو وجيعة الراس
- فنيين و مراقبين من دول اخرى محايدين باش يقدمو الدعم الفني و المراقبة
و خااااااااااااااااصة
-
قانون يفرض انو كل مواطن تونسي يبعث الـ آس آم آس يلزمو يخلــّيه مسجّل في بورتابلوه
- نتائج التصويت تهبط رسميا و فوريا ع الانتــــــــــــــرنت مبوّبة بالولايات او المعتمديات و كل نومرو تلفون قدامو التصويت متاعو بالطريقة اللي تمكن كل مواطن باش ينجم يثبت
و الناس الكل تجّم تحسب و تراقب
- بالطبيعة ثمة شكون باش يقول ماعنديش بورتابل او غيرو
هذاكة دور الحكومة تجّم توفر بورتابلوات مثلا في مراكز البريد او غيرو لاستعمالها في التصويت فقط (المهم موش في الشعب و لجان التنسيق خاطر انا واحد مالناس و ليت نتزوغب كي نسمع الكلمات هذوما)
- لي كارت سيم يلزم الحكومة توفرهم للمواطنين مجانا

و نكونو هكاكة حجّمنا للحكومة اللي ناوية عالخنن
و قصينالها قصة ما نجمش نقول عليها قصة عربي
خاطرها قصة تكنولوجية
و كلمة عربي قعدت ديمة مربوطة بالتخلف
و تصوّرو انتوما ردّة الفعل العالمية كان نعملوها











samedi 19 février 2011

هل تمّ الاعتداء جنسيا على نجيب الشابي من قبل البوليس السياسي ؟


نجيب الشابي و مية الجريبي كانولي أنا واحد مالناس أكبر صدمة ماللي بدات
" الثورة "
(اهيكة ثورة مابين ظفرين باش اللي عندهم تحفظ عالكلمة ما يتغششوش )
الشابي كان بطبيعتو معارض لــُعب , مية ممكن كانت أهون شوية
لكن اللي يعمل فيه الشابي يدوّخ
"الراجل " (اهوكة كيف كيف ظفرين ) كانت عندو فرصة موش نورمال باش يكون
من أقوى رجال المعارضة في تونس هذا اذا كان موش أقوى واحد
ممكن حتى كان ينجم يكون في بلاصة بن علي خاطر الشعب ما عندوش برشة خيارات
في تونس ما عناش واحد كيما البرادعي في مصر مثلا يعني واحد يعرفوه التوانسة عندو طموح باش يولــّي رئيس
الشابي على عكس المرزوقي موش متهم بالالحاد
قوس صغير عالمرزوقي : غلطة المرزقي هي انو موش منافق كيما راشد الغنوشي
الغنوشي يستعمل في التقيّة و اللي هي نفاق شرعي " شرعي جاية مالشريعة
موش مالشرعيّة " و قال اللي الديمقراطية ماتتنافاش مع الاسلام باش الناس الكل
تتعاطف معاه
المرزوقي للاسف ما هواش منافق ... و للاسف بهيم برشة خاطر ماعرفش
ياخذ التوانسة
التونسي حتى كانو ماركة بِربـِرْ و رُجرُج تقلو حاجة هكة ولا هكة
عالاسلام او على محمد يكرّز و يقلك يا كافر
نسكرو قوس بومرايات و نرجعو للفرطاس
قالو عطاوه 50 مليون .. 50 مليون فلوس هي ؟ . ياخي اللي يعرف انو باش يوصل للعين متاع الفلوس باش ياقف في وسط الثنية يشرب شربة ماء و يرجع ؟
الشابي ولـّى يعارض في المعارضة , يشكر في مرجان , ضدّ حلان التجمع , ضد مجلس حماية الثورة .. ضد برشة " مناضلين " في الحزب متاعو و ضد الشعب التونسي الكل
هذا الكلـّو على خمسين مليون ؟؟؟؟
باهي نقولو عطاوه أكثر برشة و هو حاجتو كان بالفلوس ! و السلطة ماتعنيلو شي ؟
أنا مخــّي تـْـــنــَـاكـْ
هذاكة علاش المخــيّلة الضيقة متاعي جادت عليّ بالفكرة الوحيدة اللي في العنوان ..خاصة و أنو البوليس السياسي في تونس عملها قبل برشة مرّات . يصوّرولو فيديو
و هوما يعملولو في الفاحشة ... و يولي أقوى ماريونات
و اللي عندو تفسير آخر بربي يقلي خاطر بالحق ماعادش نستوعب



lundi 14 février 2011

الاسلام والديمقراطية : ملوخية بالحوت

السواد الاعظم متاع التوانسة...

... مسلمو ما قبل الفضائيات

برشة يصليو و يعطيو حق ربي

يصومو رمضان و يعد شقان الفطر يتعداو للقهوة للصباح الرامي و البيلوط..

و اللي يشربو يدوروها في رمضان زطلة

نحبو نصوحبو البنات اما ناخذوش بنيّة مطرشقة

هذاكة هو التونسي

مسلم ... يحترم الاسلام بطريقتو

عنا ثقافتنا و عاداتنا

كورتنا و مزودنا

بحرنا و عروساتنا و مهرجاتنا

كلمة عيب تتقال أكثر من كلمة حرام

لكن جماعة بولحية الشيئ هذا ما يعجبهمش

يحبونا مسلمين من نوع طالبان

كل شيئ حرام

و كل شيئ يفتيو فيه

بالعربي يحبو يكرهونا في عيشتنا....

...

..

...

شهر لتالي بن علي هرب

و الغنوشي رجع

و قال اللي هوما مع الديمقراطية

نفس نوع الكذب متاع عمرو خالد و امثالو

الاسلام دين تسامح و لا اكراه في الدين و .. لكم دينكم و لي ديني

يستخايلونا مافيبالنا بشيئ و ما نعرفو شيئ

بعد ما يتمسكنو ... يتمكنو ... و نهارت اللي يتمكنو يخرجولنا جماعة أخرين يقولولنا غاااااااااالط الاية هذي مثلا وقع نسخها

الناسخ و المنسوخ في القرآن علم كامل

الاية الكريمة لكم دينكم ولي ديني آية نسخت ... بقي حرفها و رُفع حكمها

يعني آية نقراوها بركة اما ماعادش نخدموا بيها

هذا مثال صغير من مائة الف مثال

ثم ندخلو في مناظرات و حوارات موش ممكن نتصوروها

و في عوض نحكيو في الميديا على امور تنفع البلاد نوليو النهار و طولو نسمعو في المناظرات و النقاشات حول ارضاع الكبير و ختان الاناث و تحريم الموسيقى و هات من هاك اللاوي

تولي عاد جماعة الامر بالمعروف و النهي عن المنكر تخدم على رواحها

يا ولادي موش قلنا ديمقراطية و حرية ؟؟؟؟

يقولولك الديمقراطية امسح بيها

انا واحد مالناس : يرجع بن علي و لا يحكمو فيّ الخوانجية

عندهم نفاق و كذب ينطق الحجر

كي خرج البابا الالماني عامين لتالي و قال اللي الاسلام انتشر بالسيف

خرجو جماعة بولحية يعيطو ...

لا الاسلام انتشر بأخلاق المسلمين

على شكون يكذبو ؟؟؟؟

و الفتوحات من ايران للاندلس عملناهم بالكرام شانتيي ؟؟؟

هذاكة ديننا و أحنا قابلين بيه اما ما تكذبوش عالعباد

برنامجهم توى : يركشو ... ما يتقدموش للحكم خاطر يعرفو اللي حتى كان الشعب باش ينتخبهم ما عندهم وين يوصلو

لا امريكيا و لا الجيش و لا الداخلية باش يخليوهم

...

يحبو الساعة يشدو البلايص الصحاح بالشوية بالشوية

و بعد يردولنا تونسنا كيما ايران

الديمقراطية مع الاسلام كذبة كبيرة

الديمقراطية معناها كان انا نبدل ديني انا حر

لكن هذا في الاسلام يعني مرتد و يلزم يلعبولي براسي

الديمقراطية تعني حرية الراي

في الاسلام اذا رايك يخالف الشريعة معناها كافر و يلعبولك براسك

الديمقراطية معناها كان ما نحبش نمشي نصلي الجمعة و نخلي حانوتي محلول انا حر

الاسلام بالمذاهب الاربعة متاعو و منهم المالكي متاعنا يكفر تارك الصلاة و يلعبلو براسو

لكن زادة من باب آخر

الديمقراطية اللي يطبقو فيها في الغرب ما تواتيناش

في الغرب تخرج عريان زبنطوط للشارع تاخو خطية صغيرة و يلبسوك حاجة و تروح

في الغرب الراجل ينجم يعرس براجل و يزيدو يستبناو وليّد كان يحبو

في الغرب تنجم تقول اللي تحب و تهين رئيس دولة و تهين اي واحد و تتمسخر عليه

و الشيئ هذا زادة موش متاعنا

اللي يقول نحبو ديمقراطية و حكم اسلامي معتدل و الديمقراطية لا تتنافى مع الاسلام نقلو راك يا اما جاهل او تكذب على روحك و تكذب علينا و تحب تتمسكن حتى تتمكن

الاسلام و الديمقراطية عبارة على ملوخية و حوت ... الملوخية بنينة ... و الحوت بنين ... اما ملوخية بالحوت ... ؟ تعمل العطعط

يلزمنا نختارو يا اما اسلام

او ديمقراطية

و كان نحبو عالديمقراطية

يلزمنا ديمقراطية و حرية نكتبوها و نحددو الملامح متاعها احنا

ديمقراطية تسيب الحرية الدينية ... و الحرية الدينية يلزمها تكون زادة في حدود و ظوابط معينة

كيما الحرية متاع الفساد

باش مانسيبوش الماء عالبطيخ

لا على هذا

و لا على هذاكة

يلزمنا ديمقراطية

مفصلة على قدنا .. تواتينا.

.. ديمقراطية جديدة ... ديمقراطية

made in tunisia

dimanche 13 février 2011

تونسي في الكوما من ديسمبر قام كان اليوم

بعد غيبوبة في قسم العناية المركزة في مستشفي الرابطة بسبب حادث سير استمرت منذ منتصف ديسمبر 2010
افاق منذ قليل ... سمع ضجيجا و صراخا عبر النافذة ... ضغط على زر النجدة
جاءت ممرضة حسناء ... ابتسمت ابتسامة عريضة و قالت : آآآ فقت ؟ الحمد الله على سلامتك
هو: مارسي يا ...حوتة .. قلي اش فمة ياخي البرّة هالعياط الكل
هي : ثمة قراف متاع موظفين
هو :علاش ؟
هي : ثمة شكون طالب الترسيم و ثمة شكون طالب الزيادة في الشهرية
هو : اي علاش لا ... ما فيها باس
حدقت به الممرضة برهة ثم تحولت ملامحها الى مزيج غريب من الفضول و المفاجئة
نظر اليها وقال مستغربا : شبيك تغزرلي خايفة تقولش عليك شفت عبيثة
هي ( تصرخ ): ماتقليش مافيبالكش ؟ اي بالحق منين في بالك ؟ انت في الكوما عندك 7 جمعات
هو : اش ثمة يا بنتي شبيك ؟
هي : مانا عملنا ثورة !! و بن علي قطع للسعودية
هو : نعم للة ؟؟؟؟؟؟؟؟؟؟؟؟؟؟؟؟؟
... جحظت عيناه و بدى لها أنها تسمع نبضات قلبه المتسارعة ...
بدى لها أنه لن يصدقها أبدا ... أراد أن يقول لها انه مريض و لا مجال لمثل هذه الدعابة البائسة ...
ناولته الجريدة ...
نظر الى التاريخ على اليومية المعلقة على الحائط ... التاريخ على الجريدة ...
انتابته حالة من الجمود

أخذت تقص عليه ما جرى....
منذ البداية ...
بداية البداية ...
بداية من الصفعة ....
انهمرت دموعه مدرارا ... كان يبكي كطفل صغير .. يبكي مالفرحة ... يبكي بالغصّة
جلبت له كوبا من الماء و استدعت الطبيب و اتنشر الخبر في المستشفى
و تدفق الفضوليون من ممرضين و عاملين و مواطنين لرؤية ردة فعله
هو : اي ما قلتوليش ؟ شكون رئيس توى ؟
واحد : فؤاد المبزع
هو : نعم ؟؟؟؟ ياخي ما حطوهش في الحبس هذاكة ؟؟
واحد اخر : تي لا .. رئيس مؤقت حتى يعملو انتخابات
هو : ملا حكاية ... عاد كملتو خليتو محمد الغنوشي وزير اول و انتوما صرفتو صرفتو
انفجر كل الحاضرين ضحكا .. و قال احدهم : تقولش عليك حاضر
هو : البرلمان و التجمع تحلوشي ؟
واحد : لا مازالو
هو : فاش تستناو ؟؟؟؟؟؟؟
هذه المرة لم يجبه أحد ... و انفض الجميع من حوله
صرخ بأعلى صوته : و تقولولي ثورة ؟؟؟؟